कलिलैमा अस्ताएका क्रिकेटर सिंहको सम्झनामा दीप प्रज्वलन

धनगढी, १९ पौष – डडेलधुराको आलिताल गाउँपालिका–६ का क्यान्सर पीडित क्रिकेटर स्वर्गीय केशव सिंहको सम्झनामा  दीप प्रज्वलन गरिएको छ । 
सिंहको २७ वर्षकै कलिलो उमेरमा हिजो डडेल्धुरामा निधन भएको थियो । उनको  सम्झनामा आज  यस क्षेत्रका क्रिकेट प्रेमीहरूले धनगढीको पार्क मोडमा जम्मा भएर दीप प्रज्वलन गरिएको जिल्ला खेलकुद विकास समिति कैलालीका क्रिकेट कोच ज्ञानेन्द्र दडिमाना क्षेत्रीले बताए । सिंहको निधनले नेपाली क्रिकेट जगतलाई अपूरणीय क्षति भएको क्षेत्रीको भनाइ छ। 
धनगढीको बोराडाँडीमा दिदीको घरमा बस्दै आएका उनी केही दिन अगाडि मात्रै पहाड घर डडेल्धुरा गएका थिए। त्यसअघि दिल्लीमा उपचारका लागि गएका उनलाई बचाउन समस्या भएको भन्दै घर फर्काइएको थियो।
कलेजो र फोक्सोको क्यान्सरबाट पीडित सिंहको आर्थिक अवस्था कमजोर भएकाले उपचारमा समस्या हुँदै आएको थियो। उनको भारतको राजधानी दिल्ली स्थित राजीव गान्धी अस्पतालमा लामो समय सम्म उपचार भएको थियो।
आर्थिक अवस्था कमजोर भएका कारण उपचारमा समस्या भएपछि सुदूरपश्चिममा उनलाई बचाउन अभियानसमेत थालिएको थियो। उनले डडेलधुराबाट विभिन्न समयमा क्षेत्रीय क्रिकेट प्रतियोगिता खेलेका थिए।