डडेल्धुराका सङ्क्रमित सरकारी कर्मचारीले पनि जिते १० दिनमा कोरोनालाई

धनगढी, जेठ १९ - सुदूरपश्चिममा छैटौँ व्यक्तिले कोरोना भाइरस लाई जितेका छन्। डडेल्धुराको परशुराम नगरपालिका वडा नम्बर १० का २८ वर्षीय युवकले १० दिनमै कोरोनालाई जितेका हुन्।

सेती प्रादेशिक अस्पतालको प्रयोगशालामा गरिएको परीक्षणका क्रममा उनको दुई पटक रिर्पोट नेगेटिभ आएपछि डिस्चार्ज गरिएको डडेल्धुरा अस्पतालका निमित्त मेडिकल सुपरिटेन्डेन्ट डाक्टर जगदिश विष्टले बताए। 

सरकारी कर्मचारी समेत रहेका ती युवकमा गत जेठ ९ गते कोरोना सङ्क्रमण पुष्टि भएको थियो। यो सँगै सुदूरपश्चिममा कोरोनाको सङ्क्रमणबाट मुक्त हुनेको सङ्ख्या ६ पुगेको छ।

धनगढी उपमहानगरपालिका वडा नम्बर ५ का ३४ वर्षीय पुरुष सोही ठाउँकी ३४ वर्षीय महिला, कैलाली लम्कीका २१ वर्षीय युवक र कञ्चनपुरको बेदकोट नगरपालिकाका ४१ वर्षीय पुरुष र लम्कीकी ६१ वर्षीय महिला यसअघि नै कोरोनालाई जितेर घर फर्किसकेका छन्।

यस्तै अछामका ३२ वर्षीय पुरुषमा पनि कोरोना पुष्टि भएकोमा उनी १६ दिनमा कोरोनालाई जितेर घर फर्किसकेका छन्। उनको भने प्रदेश बाहिरको बलम्बु अस्पतालमा उपचार भइरहेको थियो।