कैलाली प्रहरीले विप्लव समूहका नगर इन्चार्ज सहित ६ जनालाई नियन्त्रणमा लियो 

धनगढी असार १४ – धनगढीबाट विप्लव समूहका नगर इन्चार्ज सहित ६ जना पक्राउ परेका छन् । जिल्ला प्रहरी कार्यालय कैलालीबाट खटिएको टोलीले नगर इन्चार्ज प्रकाश रावल सहितका ६ जनालाई पक्राउ गरेको हो । कैलालीका प्रमुख प्रहरी उपरीक्षक अनुपम शमशेर जबराले धनगढी उपमहानगरपालिका वडा नम्बर १२ को जुगेडा क्षेत्रबाट उनीहरूलाई पक्राउ गरिएको जानकारी दिए ।

पक्राउ पर्नेमा विप्लव निकटको अखिल क्रान्तिकारीका केन्द्रीय सदस्य बबरजंग सिंह सहित डम्बर सुनार, दलबहादुर विक, सुवास जोशी र लक्की शाह रहेका छन् । उनीहरूलाई शङ्कास्पद गतिविधिमा संलग्न भएको आशङ्कामा पक्राउ गरिएको प्रहरीले जनाएको छ भने केहीलाई पुराना मुद्दामा अनुसन्धानका लागि पक्राउ गरिएको हो ।