गरिब–असहायको सहारा बनिरहेकी जयन्ती : तीजको अवसरमा विपन्नलाई राहत

दैलेख – हिन्दु नारीहरूको महान् चाड हरितालिका तिजको अवसर पारेर दैलेखमा आर्थिक अवस्था कमजोर भएका परिवारलाई राहत वितरण गरिएको छ । नारायण नगरपालिका २ जाहारकोट निवासी हाल अमेरिकाको भर्जिनियामा बस्दै आएकी समाजसेवी जयन्ती थापाको आर्थिक सहयोगमा उक्त राहत सामाग्री वितरण गरिएको हो ।

कलाकार तथा समाजसेवी लोकेन्द्र जिसी कुमारको पहलमा जिसीमार्फत नै आज सदरमुकामको राम मन्दिरमा विपन्न परिवारका सदस्यहरूलाई राहत सामाग्री वितरण गरिएको हो ।दैलेखको नारायण नगरपालिका ७ का ३ जना एकल महिलाको परिवार तथा २ जना आर्थिक अवस्था कमजोर भएका गरी ५ घरपरिवारका सदस्यलाई राहत स्वरूप खाद्यान्न सामाग्री वितरण गरिएको हो ।

नारीहरूको महान् पर्व तिजको अवसर पारेर प्रति परिवार १ बोरा चामल, १ केजी नुन, १ केजी दाल र १ लिटर तेल वितरण गरिएको छ । राहत सामाग्री वितरण पश्चात् बोल्दै कलाकार तथा समाजसेवी लोकेन्द्र जिसी कुमारले आर्थिक रूपले अति विपन्न परिवारलाई सहयता गर्नु सराहनीय कार्य भएको बताए । समाजसेवी थापाले हालसम्म देशका अधिकांश विपन्न परिवारका सदस्यलाई यसरी नै राहत स्वरूप सहयोग गरिसकेको र यसै अभियान अन्तर्गत आज दैलेखका विपन्न परिवारलाई सहयोग गरेको जानकारी दिए । 

यस्तै खाद्यान्न सामग्री बुझ्दै विपन्न परिवारका सदस्यहरूले समाजसेवी तथा सहयोगी जयन्ती थापाप्रति आभार व्यक्त गरेका छन् । तिज नजिकिँदै गर्दा घरमा के खाने भन्ने चिन्तामा आफूहरू रहेको समयमा राहत स्वरूप खाद्यान्न पाएपछि आफूहरूलाई निकै खुसी लागेको बताइन ।