पूर्वआइजिपी रमेश चन्द जेल चलान

काठमाडौं– सुडान घोटाला प्रकरणमा दोषी ठहर भएका पूर्वआइजिपी रमेश चन्द ठकुरी जेल चलान भएका छन्। सजायँ पाएको २ वर्षपछि बिहीबार सर्वाेच्च अदालतमा हाजिर भएका चन्दलाई डिल्लीबजार कारागार चलान गरिएको हो। 

सुडान घोटाला मुद्दामा दुई वर्षअघि तत्कालिन प्रधानन्यायाधीश सुशीला कार्कीसहितको संयुक्त इजलासले चन्दसहित पूर्वआइजिपी ओमविक्रम राणा, हेमबहादुर गुरुङ लगायतलाई घोटालामा संलग्न प्रहरी कर्मचारीलाई दोषी ठहर गर्दै सजाय सुनाएको थियो। फैसलालगत्तै राणा र गुरुङ लगायत कारागार चलान भएका थिए। तर, चन्द भने फरार थिए। बिहीबार आफूमाथि भएको सजाय पुनरावलोकनका लागि बाहिरै बसेर कानुनी लडाइ लड्ने भन्दै अदालतमा उपस्थित हुँदै निवेदन दिएका थिए। सर्वाेच्च प्रशासनले निवेदन अस्वीकृत गरेसँगै उनी फैसला कार्यान्वयनका लागि कारागार चलान भएका हुन्। 

सर्वाेच्चले पूर्वआइजिपी राणालाई २ वर्ष कैद र ५० हजार जरिवाना तथा चन्द र गुरुङलाई एक वर्ष कैद र ४० हजार जरिवानाको सजाय तोकेको थियो।