३० रुपैयाँमै विशेषज्ञ सेवा दिने अस्पतालले २ सय जेष्ट नागरिकको निःशुल्क जाँच गर्‍यो

धनगढी, असार २१ - गोदावरी नगरपालिकामा पर्ने अत्तरियाको बन खेत स्थित सुदूर पश्चिमाञ्चल सामुदायिक अस्पतालले ज्येष्ठ नागरिकहरूका लागी निःशुल्क मधुमेह शिविर सम्पन्न गरेको छ ।

ज्येष्ठ नागरिकहरूमा मधुमेहको समस्या बढी देखिएको अवस्थालाई मध्यनजर गर्दै गोदावरी नगरपालिकाका ज्येष्ठ नागरिकहरूका लागी अस्पतालले निःशुल्क शिविर आयोजना गरेको हो । शनिबारसम्पन्न १ दिने शिविरमा २ सय भन्दा बढी ज्येष्ठ नागरिकले निःशुल्क स्वास्थ्य सेवा लिएका छन् । घरबाट टाढा गएर जाँच गराउनु पर्ने तथा महँगो शुल्क तिर्न नसकेर बसेका ज्येष्ठ नागरिकहरूका लागी निःशुल्क शिविरको आयोजना गरेको अस्पतालका सञ्चालक आनन्द भट्टले जानकारी दिए ।

सेवामुखी भावनालेनै सामुदायिक अस्पताल सुचारु गरेको बताउँदै उनले यस्ता निःशुल्क शिविरहरूलाई निरन्तरता दिने जानकारी दिए । अस्पतालले निःशुल्क शिविर आयोजना गरेसँगै गोदावरी नगपालिकाका ज्येष्ठ नागरिकहरू खुसी भएका छन् । महँगो शुल्क तिर्न नसकेर मधुमेहको चेकजाँचनै गर्न नपाएका ज्येष्ठ नागरिकहरूले निःशुल्क जाँच गर्न पाउँदा खुसी लागेको बताए । यस्ता कार्यक्रमले निरन्तरता पाए कुनै पनि नागरिक स्वास्थ्य सेवाबाट वञ्चित नहुने ज्येष्ठ नागरिकहरू बताउँछन् ।

सुदूर पश्चिमाञ्चल सामुदायिक अस्पतालले ३० रुपैयाँमै विशेषज्ञ सेवा समेत दिँदै आएको छ ।