डा. बद्री विनाडीद्धारा जोराघाट माविमा १ लाख ५१ हजार राशिको पुरस्कार स्थापना

डोटी २ श्रावण - सह प्राध्यापक तथा लोक साहित्यका ज्ञाता डा. बद्री शर्मा विनाडीले जोराघाट माध्यमिक विद्यालयमा ‘तुलसा-भीमलाल विनाडी स्मृति पुरस्कार’ स्थापना गर्नुभएको छ । उहाँले आफ्नी स्वर्गीय आमा तुलसा विनाडी र बुबा भीमलाल विनाडीको सम्झनामा १ लाख ५१ हजार १ सय ११ रुपैयाँ धनराशिको उक्त पुरस्कार स्थापना गर्नुभएको हो । लोक साहित्यमा विद्यावारिधि गर्नुभएका विनाडीले यहाँको मौलिक संस्कृति जगेर्ना गर्ने उद्देश्यले उक्त पुरस्कार स्थापना गरिएको बताउनु भयो । तत्कालीन सात्फरी गाउँ विकास समितिको जोराघाटमै जन्मिनु भएका विनाडीले पुरस्कार राशिको रकम वार्षिक रूपमा वृद्धि गर्दै लगिने समेत बताउनु भएको छ । प्रत्येक वर्ष विद्यालयले सुदूरपश्चिमको मौलिक पर्व गौराका अवसरमा मावि स्तरीय निबन्ध प्रतियोगिता आयोजना गरी उक्त प्रतिस्पर्धामा प्रथम, द्वितीय र तृतीय स्थान हासिल गर्ने विद्यार्थीलाई उक्त पुरस्कारबाट पुरस्कृत गरिने छ । साथै सान्त्वना स्थान हासिल गर्ने विद्यार्थीलाई प्रमाणपत्रसहित उक्त पुरस्कार राशिबाटै सम्मान समेत गरिने छ ।

विद्यालयमा ‘तुलसा-भीमलाल विनाडी स्मृति पुरस्कार’ स्थापना पछि खुसी व्यक्त गर्दै विद्यालयका प्रधानाध्यापक लोकराज विनाडीले यसले विद्यार्थीको लेखन क्षमता तथा सृजनशीलता अभिबुद्धिसँगै डोटेली संस्कृतिको स्तरवृद्धिमा टेवा पुग्ने विश्वास व्यक्त गर्नु भयो । ‘यो पुरस्कारबाट वार्षिक गौरा पर्व विशेष निबन्ध प्रतियोगिता आयोजना गरिने छ,’ उहाँले भन्नुभयो, ‘यसरी आयोजना हुने प्रतियोगिताबाट निबन्ध लेखनमा त विद्यार्थीको कौशल अभिवृद्धि हुने छ नै, साथसाथै हाम्रो संस्कृति, डोटेली भाषा–साहित्य र गौराका गाथा पुस्तान्तरणमा समेत टेवा पुग्ने छ ।’

पछिल्लो समय गौराको मौलिकपन लोप हुने खतरामा पुगेको संस्कृतविद्हरूको चिन्ता छ । यस्ता कार्यले डोटेली भाषा, साहित्य, संस्कृति र सभ्यताको पहिचानलाई पुस्तान्तरण गर्न मद्दत पुग्ने विश्वास व्यक्त गरिएको छ ।