बैतडीका एक शिक्षक तीन दिनदेखि बेपत्ता, खोजी कार्य जारी 

बैतडी,०७ भदौ । बैतडीका एक शिक्षक तीनदिनदेखि बेपत्ता रहेका छन् । जिल्लाको डिलाशैनी गाउँपालिका २ गोगनी घर भएका ५२ बर्षीय शिक्षक जयबहादुर बोहरा मंगलबार साँझदेखि बेपत्ता रहेका जिल्ला प्रहरी कार्यालय बैतडीका प्रवक्ता, प्रहरी निरीक्षक खेमविक्रम केसीले बताए । 

लटिनाथ आधारभूत विद्यालय अमरखेतमा कार्यरत शिक्षक बोहरा भदौ ५ गते मंगलबार बेलुका विद्यालयबाट घर फर्किदा बेपत्ता भएका हुन् । शिक्षक बोहरा बेपत्ता भएको खबर प्रहरीलाई बुधबार साँझ मात्रै प्राप्त भएको प्रहरी निरीक्षक केसीले बताए । उनले भने ‘मंगलबार विद्यालयबाट घर नफर्केपछि शिक्षक बोहरा बेपत्ता भएको खबर हामीलाई बुधबार आयो । अहिले खोजी कार्य जारी रहेको छ ।’

बेपत्ता शिक्षकको स्थानीय गन्नीगाडको छेउमा चप्पल फेला परेको बताइएको छ । बेपत्ता शिक्षक बोहराको खोजीका लागि इलाका प्रहरी कार्यालय पाटनका प्रमुख प्रहरी निरीक्षक सरोज ठकुराठीको नेतृत्वमा प्रहरी टोली गन्नीगाड क्षेत्रमा परिचालन गरिएको जिल्ला प्रहरी कार्यालय बैतडीले जनाएको छ ।