मातृभाषा शिक्षा शिक्षक महासंघको सुदूरपश्चिम संयोजकमा जोशी

धनगढी, ३ फागुन - मातृभाषा शिक्षा शिक्षक महासंघ सुदुरपश्चिम प्रदेश संयोजकमा गीता जोशी चयन हुनुभएको छ । मातृभाषामा शिक्षालाई प्रभावकारी ढंगमा कार्यान्वयनमा लैजाने उद्देश्यसहित् देशभरका शिक्षकहरु संगठित् भएका छन् । विद्यालय तहमा संविधानले निर्दिष्ट गरेबमोजिम मातृभाषामा सहज ढंगबाट शिक्षा उपलब्ध गराउने हेतुका साथ देशभरका शिक्षकहरु ‘मातृभाषा शिक्षा शिक्षक महासंघ’ गठन गर्दै संगठित् भएका हुन् ।
जोशी हाल डोटीको सिलगढी स्थित पद्म पब्लिक मुक्ति नारायण माध्यमिक विद्यालयमा प्रधानाध्यापक हुनुहुन्छ । महासंघको केन्द्रीय समितिले सबै प्रदेशका इन्चार्ज एवं संयोजकहरुलाई सम्बन्धित प्रदेशभित्र महासंघ विस्तार गर्न जिम्मेवारी प्रदान गरेको छ । जोशीको नेतृत्वमा गठन हुने प्रदेश कमिटीबाट डोटेली भाषा तथा साहित्यको विकासमा ठोस योगदान पुग्ने विश्वास गरिएको छ ।