कैलालीको टीकापुरबाट ब्राउन सुगरसहित दुई जना पक्राउ

धनगढी, फागुन ४ – कैलालीको टीकापुरबाट लागु औषध खैरो हिरोइन सहित दुई जना पक्राउ परेका छन् । टीकापुर नगरपालिका वडा नम्बर ९ को खक्रौला सडक खण्डमा भारतबाट आइरहेको सु.प.प्र.०१–००७प ९२९१ नम्बरको मोटरसाइकलमा लागु औषध ल्याउँदै गरेको अवस्थामा दुई जनालाई पक्राउ गरिएको प्रहरीले जनाएको छ।
जिल्ला प्रहरी कार्यालयका प्रहरी नायव उपरीक्षक दक्ष कुमार बस्नेतका अनुसार लम्की चुहा नगरपालिका वडा नम्बर १ भुरुवाका २४ वर्षीय चन्द्र बहादुर बुढा र सोही ठाउँका २२ वर्षीय रमेश शाहीलाई पक्राउ गरिएको हो ।

इलाका प्रहरी कार्यालय टीकापुरबाट खटिएको प्रहरीको टोलीले उनीहरूबाट ३० ग्राम ९ सय मिलिग्राम खैरो हिरोइन(ब्राउन सुगर) बरामद गरेको छ । कालो पोलिथिनमा लुकाएर ल्याउँदै गर्दा उक्त परिमाणको लागू औषध बरामद गरिएको हो । उनीहरूको मोटरसाइकल समेत बरामद गरिएको छ।