प्रदेशले वितरण गरेका एम्बुलेन्स कोरोनाका संकास्पद बिरामी बोक्न प्रयोग गरिने

धनगढी, फागुन २६ – कोरोना भाईरसको जोखिमलाई मध्यनजर गरी रोकथाम, पहिचान, उपचार र व्यवस्थापन गर्न सुदूरपश्चिम प्रदेश सरकारको बैठक सम्पन्न भएको छ । आईतबार सुदूरपश्चिम प्रदेशका मुख्यमन्त्री त्रिलोचन भट्टको अध्यक्षतामा बसेको बैठकले विश्वव्यापी रुपमा फैलिएको कोरोना भाइरसको रोकथाम, पहिचान, उपचार र व्यवस्थापन सम्बन्धमा भएका कार्यहरुको समिक्षा समेत गरिएको छ ।
बैठकले सुदूरपश्चिम प्रदेश सरकारले वितरण गरेका एम्बुलेन्स कोरोना भाईरसको संकास्पद बिरामीलाई ओसार पसार गर्न प्रयोग गरिने निर्णय गरेको छ ।
बैठकपछि सुदूरपश्चिम प्रदेश सरकारले एक प्रेश विज्ञप्ती जारी गरी प्रदेश सरकारद्धारा वितरण गरिएका एम्बुलेन्स लगायतका अन्य एम्बुलेन्सहरु कोरोनाको संकास्पद विरामीलाई ओसार पसार गर्न प्रयोग गरिने जनाएको हो । विज्ञप्तीमा संकास्पद बिरामी ओसार पसार गर्न सबै जिल्लामा एम्बुलेन्स तयारी अवस्थामा राख्ने र एम्बुलेन्सको नम्बर तथा चालकको नाम सम्बन्धित हेल्थ डेस्कमा उपलब्ध गराउने उल्लेख छ ।
बैठकले सम्पुर्ण जिल्लामा क्यारेन्टाईको लागि भवनको व्यवस्था गर्न सम्बन्धित स्वास्थ्य कार्यालयले जिल्ला प्रशासन कार्यालय संग समन्वय गर्ने निर्णय गरेको छ ।