मुख्यमन्त्री भट्ट र नगरप्रमुख वड बिच कोरोना सङ्क्रमण रोकथाम कार्यको समीक्षा
धनगढी, जेठ २५ – सुदूरपश्चिम प्रदेशका मुख्य मन्त्री त्रिलोचन भट्ट र धनगढी उप–महानगरपालिकाका प्रमुख नृपबहादुर वड बिच कोरोना रोकथामका लागि भइरहेका गतिविधीहरुको समीक्षा भएको छ ।
ठुलो प्रयासका कारण कोरोना क्वारेन्टाईनमा रहेकाहरूमा सीमित राख्न सकेको निष्कर्ष उनीहरूको थियो । ‘कोरोना परीक्षण गर्ने मेसिनको अभावले समस्या भइरहेको छ’ मुख्यमन्त्री त्रिलोचन भट्टले भने, ‘त्यसैले मेसिन थपका लागि पहल भइरहेको छ । महामारीको बेला सबैले रचनात्मक भूमिका खेल्नुपर्ने आवश्यकता छ ।’ उनले भने, ‘श्रोत साधनले भ्याए सम्म तीनै तहका सरकार जुटेका छन् ।’
धनगढी उप–महानगरपालिकाका प्रमुख नृपबहादुर वडले धनगढी उप–महानगरपालिका सीमामै भएकाले भारतबाट भित्रिरहेकाहरूको व्यवस्थापनमा थप मारमा परेको बताए । ‘रातदिन नभनेर जनप्रतिनिधि , स्वास्थ्यकर्मीहरू खटिएका छन् ।’ नगरप्रमुख वडले भने, ‘केही मान्छेहरू चुनौतीको अवस्थामा रचनात्मक भूमिका खेल्नु भन्दा मनोबल कमजोर बनाउने काममा उद्धत छन् ।’