प्याब्सन,एनप्याबसन र ईस्टु बिच सहमती, संयुक्त बिज्ञप्ति जारी

४ साउन,२०७७
निजि तथा आवासीय विद्यालय अर्गनाइजेसन( प्याब्सन), रास्ट्रीय निजि तथा आवासीय विद्यालय अर्गनाइजेसन ( एनप्याबसन) र संस्थागत विद्यालय शिक्षक युनियन ( इस्टु) बिच आइतबार चार बुदामा सहमति भएको छ।

निजि विद्यालयहरुमा कार्यरत शिक्षक–कर्मचारीहरुलाई साउन देखि बेतलबी विदा दिने निर्णय प्याब्सन र एनप्याबसनले फिर्ता लिने भएपछि सहमती जुटेको हो।

सहमति पछि तीन वटै संगठनका अध्यक्ष द्वारा जारी संयुक्त प्रेस बिज्ञप्तिमा प्याब्सन र एनप्याब्सनले निजी विद्यालयमा कार्यरत शिक्षक कर्मचारीको २०७६ चैतसम्मको बक्यौता तिर्न आफ्ना सदस्य विद्यालयहरूलाई निर्देशन दिने उल्लेख छ। लकडाउन अवधीको तलब सुविधाबारे छलफल गर्न कार्यदल गठन गरिएको छ ।
सहमति भए सङगै संस्थागत विद्यालय शिक्षक युनियनले प्याब्सन र एनप्याब्सनको निर्णयको बिरोधमा घोषणा गरेको आन्दोलनका कार्यक्रम फिर्ता लिएको छ ।

आफुहरुले नेपाल सरकार समक्ष पेस गरेका पेशागत र व्यावसायिक हितका साझा माग तथा विद्यालय भौतिक रुपमा खोल्ने लगायतका विषयमा सहकार्य गर्दै जाने निर्णय भएको समेत तीन वटै संगठनहरुद्वारा जारी संयुक्त बिज्ञप्तिमा उल्लेख छ ।

सरकारले आफ्नो माग सम्बोधन नगरेको भन्दै निजि विद्यालयहरुका साझा संगठन प्याब्सन र एनप्याब्सनले साउन १ बाट अनलाइन कक्षा लगायतका बैकल्पिक सिकाइ कार्यक्रम बन्द गर्नुका साथै शिक्षक तथा कर्मचारीलाई बेतलवी विदा दिने निर्णय गरेका थिए।

लगतै संस्थागत विद्यालय शिक्षक युनियनले निर्णय सच्याउन तीन दिने अल्टिमेटम दिएको थियो।