उद्यमशीलता तालिम पश्चात् सीप तथा रोजगार प्रदर्शनी मेला धनगढीमा सम्पन्न
धनगढी, पुस २ -
कैलालीको धनगढीमा तीन महिने उद्यमशीलता तालिम पश्चात् सीप तथा रोजगार प्रदर्शनी मेला सम्पन्न भएको छ । डिभोटी ट्रेनिङ एन्ड रिसर्च सेन्टर प्रा.लि. र धनगढी उपमहानगरपालिकाको संयुक्त आयोजनामा सीप तथा रोजगार प्रदर्शनी मेला सम्पन्न भएको हो ।
मेलामा डिभोटी ट्रेनिङ एन्ड रिसर्च सेन्टर प्रा.लि.ले विपन्न समुदायलाई लक्षित गरी सञ्चालन गरेको उद्यमशीलता सम्बन्धी विकास तालिम हासिल गरेका सहभागीरूको उपस्थिति रहेको थियो । प्रा.लि.ले युनेस्कोको आर्थिक सहयोगमा तालिम तथा मेलाको आयोजना गरेको जनाएको छ ।
मेलामा प्रमुख अतिथिको आसनबाट बोल्दै धनगढी उपपमहानगरपालिकाका मेयर नृप बहादुर वडले बेरोजगारीको अन्त्यका लागि आफूहरूले उद्यमशीलता विकास सम्बन्धी सीपमा जोड दिएको बताए ।
डिभोटी ट्रेनिङ एन्ड रिसर्च सेन्टर प्रा.लि.का संयोजक डम्बर विष्टले परियोजना मार्फत आफूहरूले २० जनालाई ६५ दिने भूकम्प प्रतिरोधी निर्माण–डकर्मी, २० जनालाई ३० दिने च्याउ उत्पादन तथा प्रशोधन र २० जनालाई ३० दिने दालमोठ, सस तथा अचार बनाउने तालिम प्रदान गरेको जानकारी दिए ।
ट्रेनिङ सेन्टरको आफ्नै कार्यालयमा ३ महिनासम्म दिइएको तालिमलाई बिहीबार सोही मेलाका बिच सम्पन्न गरिएको छ । कोभिड लक्षित तालिममा सहभागी ६० जनालाई तालिम पश्चात् समापनका क्रममा २५ किलो चामल, ३ किलो दाल, ५ लिटर तेल र १२ पिस साबुन समेत वितरण गरिएको छ । कार्यक्रममा सिटिइभिटि सुदूरपश्चिम प्रदेशका निर्देशक नन्दराम देवकोटाले तालिमका सहभागीहरूको सिप प्रदर्शनी मेलाको अवलोकन गरेका थिए ।