आँधी प्रभावितको उद्धारमा खटिन कार्यकर्तालाई विप्लवले यस्तो निर्देशन दिए

नेपाल कम्युनिस्ट पार्टी  (नेकपा)का महासचिव  नेत्र विक्रम चन्द विप्लवले आइतबार बारा र पर्सामा गएको आँधीबाट प्रभावितहरूको उद्धार राहतमा खटिन पार्टीका कार्यकर्ताहरूलाई निर्देशन दिएका छन्। 

सोमबार विज्ञप्ति जारी गर्दै विप्लवले पार्टी पंक्ति तथा जनवर्गीय सङ्गठनका कार्यकर्तालाई उद्धारमा खटिन निर्देशन दिएका हुन्। 

'आइतबार बेलुका बारा र पर्सामा आएको आँधी, हुरीसहितको असिना र पानीका कारण ३१ जना भन्दा बढीको ज्यान गएको र चार सय भन्दा बढी घाइते हुनुका साथै ठूलो जनधनको क्षती भएको घटनालाई लिएर हाम्रो सिङ्गो पार्टी पंक्ति निकै दुःखी भएको छ,' विज्ञप्तिमा भनिएको छ, 'उक्त प्राकृतिक प्रकोपमा परी ज्यान गुमाने सबै प्रति हार्दिक श्रद्धाञ्जली व्यक्त गर्दछौँ। मृतकका परिवार प्रति गहिरो समवेदना व्यक्त गर्दछौँ र घाइते प्रति शीघ्र स्वास्थ्यलाभको कामना पनि गर्दछौँ।'

उनले मृतकका परिवारलाई राहत र घाइतेको उपचारको व्यवस्था गर्न सरकारसँग मागसमेत गरेका छन्। 'यो दुखित घडीमा मृतकका परिवारलाई राहत, घाइतेहरूको शीघ्र उपचारको व्यवस्था गर्नुका साथै घरबार विहीनहरूको व्यवस्था गरियोस् भन्दछौँ,' विज्ञप्तिमा अगाडि भनिएको छ, 'सम्बन्धित क्षेत्रको हाम्रो पार्टी पंक्तिलाई सबै क्षेत्रबाट सहयोग गर्न निर्देशन पनि गर्दछौँ।'