सामाजिक विकास मन्त्रीको निर्देशनमा हेलिकप्टर चार्टर गरी सुत्केरीको उद्धार

धनगढी, असार ५ - सुदूरपश्चिम प्रदेश सरकारले हेलिकप्टर चार्टर गरी एक सुत्केरीको उद्धार गरेको छ । सामाजिक विकास मन्त्री कृष्णराज सुवेदीको पहलमा बाजुराको स्वामी कार्तिक गाउँपालिका १ मुक्तिकोटकी रजनी विकको उद्धार गरिएको हो । 
सुत्केरी व्यथा लागेर असार ३ गते अस्पताल भर्ना भएकी रजनीलाई अवस्था जटिल बन्दै गएको र व्यथा बढ्दै गएपछि डाक्टरले कोहलपुरका लागि रिफर गरिदिएका थिए । 
अवस्था गम्भीर भएपछि स्थल मार्गबाट कोहलपुर पु¥याउन नसकिने भन्दै हवाई चार्टरबाट उद्धार गरिएको सामाजिक विकास मन्त्री कृष्णराज सुवेदीका स्वकीय सचिव लोकेन्द्र धामीले बताए । 
सुदूरपपिश्चम प्रदेश सरकारले हालसम्म हेलिकप्टर चार्टर गरी सुदूरपश्चिमका पहाडी जिल्लाबाट ६ जना सुत्केरीको उद्धार गरिसकेको छ ।