सुजङ स्कुल : एसईईमा उत्कृष्ट नतिजा, १४ जनाको ए प्लस 

डोटी, असार १३  - डोटीको राजपुरमा रहेको सुजङ ईङलीस बोर्डिङ स्कुलले यस वर्षको एसईईमा पनि उत्कृष्ट नतिजा हासिल गरेको छ । सुजङका १४ जना विद्यार्थीले ए प्लस ल्याउन सफल भएका छन् । त्यस्तै २७ जनाले ए र ५ जनाले बी प्लस प्राप्त गरेका छन् । 
सुजङबाटै एसईई दिएकी एक छात्रा १५ वर्षीया सोनी माझीले ३ दशमलव ९ जिपीए ल्याएकी छिन् । सोनीको यो नतिजाले विद्यालय र उनको परिवारमा खुसी छाएको छ । सोनीका बुबा गोपाल माझीले छोरीको नतिजाले खुसी तुल्याएको बताए । उनले अब आफ्नी छोरीलाई उच्च शिक्षा अध्ययनका लागि सक्दो सहयोग गरेर राम्रो सङ्कायमा भर्ना गराउने पनि बताए । 

सोनीले विद्यालय र परिवारको सहयोगले आफूले उक्त नतिजा हासिल गरेको बताइन् । अझै सफलताका साथ उच्च शिक्षा अध्ययन गरेर देशकै सेवाका लागि काम गर्ने आफ्नो धोको रहेको उनको भनाइ छ । 
एसईईमा देशकै दोस्रो कमजोर नतिजा प्राप्त गरेको सुदूरपश्चिमबाट सोनीले ल्याएको नतिजाले विद्यालयको मात्रै नभएर सुदूरपश्चिमकै शिर ठाडो पारेको सुजङ स्कुल परिवारले जनाएको छ ।