पद्म पब्लिक उत्कृष्ट विद्यालयमा छनौट 

डोटी, साउन ३ - डोटीको पद्म पब्लिक मुक्तीनारायण माध्यमिक विद्यालय देशको उत्कृष्ट नमुना विद्यालयको सूचिमा छनौट भएको छ । शिक्षा विज्ञान तथा प्रविधी मन्त्रालयले देशकै उत्कृष्ट नमुना विद्यालयको सार्वजनिक गरेको सुचि अनुसार उक्त विद्यालय छनौट भएको हो । 
दिपालय सिलगढी नगरपालिका वडा नं. ६ मा रहेको सबै भन्दा पुरानो विद्यालयको रुपमा रहेको उक्त विद्यालय छनौट भएकोमा विद्यालय व्यवस्थापन समिति, विद्यालयका शिक्षक कर्मचारी, विद्यार्थि तथा आम अविभावकहरुलाई नगरप्रमुख मन्जु मलासीले बधाई दिनु भएको छ ।

जारी भएको सूचना अनुसार मन्त्रीस्तरको मिति २०७६ अषाढ २७ गतेको निर्णयले देश भरका ८४ विद्यालयहरुलाई उत्कृष्ट नमुना विद्यालयको रुपमा छनौट गरेको हो । छनौटमा परेका विद्यालयहरुलाई नमुना विद्यालय विकास एंव संचालन निर्देशिका २०७४ पहिलो संशोधन २०७५ अनुसार आबश्यक तयारी गर्न समेत निर्देशन दिईएको छ । डोटीका ९ स्थानिय तहहरु मध्ये दिपालय सिलगढी नगरपालिकामा रहेको उक्त विद्यालय देशको उत्कृष्ट नमुना विद्यालयमा परेकोले नगरपालिकालाई थप जिम्मेवारी थपिएको महशुस भएको नगर युवा शिक्षा तथा खेलकुद शाखाका प्रमुख मन्जु थापाले बताउनुभयो । थापाले भन्नुभयो, “नगरका सबै विद्यालयलाई नमुना विद्यालय बनाउने अभियानमा हामी लागि रहेका छौ । नगरका हरेक विद्यालय उत्कृष्ट हुने छन्, नमुना विद्यालय हुने छन् ।”