लम्कीमा खुकुरी प्रहारबाट एक जना घाइते

धनगढी, १७ असोज – कैलालीको लम्कीमा खुकुरी प्रहारबाट एक जना घाइते भएका छन् । शुक्रवार बिहान लम्की चौराहामा लम्किचुहा नगरपालिका २ मोतिपुरका ३० वर्षीय कृष्ण बहादुर बुढामगर माथि खुकुरी प्रहार भएको हो । तीन जनाको समूहले उनी माथि खुकुरी प्रहार गरेको कैलालीका प्रहरी नायव उपरीक्षक दक्ष कुमार बस्नेतले बताए ।

ती मध्ये एक जनालाई पक्राउ गरिएको उनले बताए । पक्राउ पर्ने लम्कीकै स्थानीय रमेश शाही रहेका छन् । घाइते मगरको लम्की स्थित लालरत्न अस्पतालमा सामान्य उपचार पछि थप उपचारको लागी कोहलपुर रेफर गरिएको प्रहरी नायव उपरीक्षक दक्ष कुमार बस्नेतले बताए ।

उनको खुट्टा र पाखुरामा चोट लागेको छ । अन्य दुई जनाको खोजी भइरहेको प्रहरीले जनाएको छ । उनीहरूबिच बिहीबार साँझ झडप भएको बुझिएको छ ।