राष्ट्रिय जनमोर्चाले लगायो धनगढीमा ‘गो ब्याक इन्डिया’ को नारा
धनगढी, २३ कार्तिक – भारतले कालापानी लगायतका नेपाली भूभाग समेटेर बनाएको नक्सा तथा अतिक्रमण विरुद्ध राष्ट्रिय जनमोर्चाले धनगढीमा प्रदर्शन गरेको छ । शनिवार धनगढीमा प्रदर्शनसहित राष्ट्रिय जनमोर्चाले ‘गो ब्याक इन्डिया’ को नारा लगाइएको हो ।
धनगढीको ए लएन चोकमा विरोध प्रदर्शन तथा कोणसभाको आयोजना गरिएको थियो । कार्यक्रमलाई राष्ट्रिय जनमोर्चाका केन्द्रीय सदस्य मनोज भट्टले सम्बोधन गर्नुभएको थियो । सम्बोधनका क्रममा नेता भट्टले वर्षौँदेखि भारतले नेपालको लिपुलेक, कालापानी, लिम्पियाधुरा लगायतका ठाउँमा अतिक्रमण गर्दै आएकोमा अब नक्सामै ती क्षेत्र समेटेर अतिक्रमणलाई वैधानिकता दिएको बताउनुभयो । भट्टले अतिक्रमित भूभाग फिर्ता गराउन अहिले नै जनताले कडा सङ्घर्ष नगरे ती भाग मात्रै गुमाउनु पर्ने नभई अतिक्रमण फैलिँदै जाने खतरा रहेको टिप्पणी समेत गर्नुभयो ।
भट्टले सरकारी तवरबाट भारतीय कदमको विरुद्ध सकारात्मक धारणा आएको कुरा उल्लेख गर्दै त्यतिले मात्रै नपुग्ने हुँदा यथाशक्य कूटनीतिक पहलको वातावरण समेत सरकारले बनाउनु पर्ने जोड दिनु भयो ।
कोणसभामालाई अखिल नेपाल युवक सङ्घका केन्द्रीय सचिव प्रशान्त थापाले समेत सम्बोधन गर्नुभएको थियो ।