डिसिए कप यु १४ को उपाधि लिटल फ्लावरलाई
धनगढी,
मङ्सिर ६ -
धनगढीमा सम्पन्न डिसिए कप यु–१४ क्रिकेट टुर्नामेन्टको उपाधि लिटल फ्लावर बोर्डिङ हाइस्कुल धनगढीले उचालेको छ । धनगढीको फाप्ला खेल मैदानमा धनगढी क्रिकेट एकेडेमीको आयोजनामा मङ्सिर २ गतेदेखि सुरु भएको प्रतियोगिताको उपाधि लिटल फ्लावरले जितेको हो ।
उपाधि सँगै लिटल फ्लावर स्कुलले १५ हजार नगद पुरस्कार प्राप्त ग¥यो ।
आज सम्पन्न फाइनल खेलमा ब्रोड भिजनलाई ५ विकेटले पराजित गर्दै लिटल फ्लावरले उपाधि उचालेको हो । टस जितेर पहिले ब्याटिङ् गर्ने निर्णय गरेको ब्रोड भिजनले निर्धारीत १५ ओभरको खेलमा १४.५ ओभर खेल्दै सबै विकेट गुमाएर ५२ रनको योगफल तयार पारेको थियो ।
ब्रोड भिजनकालागि सुशील सिंहले १४ र सन्तोष ताम्राकारले अविजित ११ रन प्रहार गरे । बोड भिजनलार्इृ सस्तैमा समेट्न लिटल फ्लावरका सन्दिप सिंहले ३ तथा सार्थक बमले २ विकेट लिए । ५३ रनको लक्ष्यसहित मैदान उत्रेको लिटल फ्लावरले १२ ओभरमा ५ विकेट गुमाएर लक्ष भेट्टायो । लिटल फ्लावरका पुस्कर बडुले अविजित १८ र पारष एैरले अविजित ११ रन प्रहार गरे भने ब्रोड भिजनका निरज एैरले ३ विकेट प्राप्त गरे ।
खेलको म्यान अफ द म्याच लिटल फ्लावरका पुस्कर बडु हुन सफल भए भने प्रतियोगिताका बेष्ट बलर ब्रोड भिजनका निरज ऐर, बेष्ट ब्याट्सम्यान स्टेपिङ स्टोनका विशाल विष्ट र म्यान अफ द सिरिज लिटल फ्लावरका नरेन भट्ट हुन सफल भए । प्रतियोगिताको समापन कैलाली जिल्ला क्रिकेट सङ्घका अध्यक्ष विक्रम विष्टले गरेका थिए ।