स्वास्थ्यकर्मी रिहाइको माग गर्दै जिल्ला प्रशासन कार्यालय मार्फत गृहलाई ज्ञापन

डोटी 
मङ्सिर, २६ -
स्वास्थ्यकर्मी हरि दत्त भट्टलाई पक्राउ गरेको विरोधमा नेपाल स्वास्थ्यकर्मी सङ्घ डोटीले जिल्ला प्रशासन कार्यालय डोटी मार्फत गृह मन्त्रालयलाई ज्ञापन पत्र बुझाएको छ । 

जिल्लाको जोरायल गाउँपालिका–वडा नम्बर १ को घण्टेश्वर स्वास्थ्य चौकी अन्तरगतको खार खोप केन्द्रमा गत मङ्सिर १७ गते खोप लगाएका स्थानीय टेकबहादुर मल्लका चार महिनाका नाति प्रवीण मल्लको मृत्यु भएको थियो । पीडित पक्षको किटानी जाहेरी पछि जिल्ला प्रहरी कार्यालय डोटीले स्वास्थ्यकर्मी हरि दत्त भट्टलाई मङ्सिर २० गते पक्राउ गरी हिरासतमा राखेको छ । 
घटनामा स्वाथ्यकर्मी माथि मुद्दा दर्ता गर्दा खोप ऐन नियमावली अनुसार अनुसन्धान अगाडी बढाउनुको सट्टा स्वास्थ्यकर्मी भट्ट माथि जिल्ला प्रहरी कार्यालय डोटीले किटानी जाहेरी दर्ता गरी स्वास्थ्यकर्मी माथि गरिएको व्यवहार प्रति नेपाल स्वास्थ्यकर्मी सङ्घ डोटीको गम्भीर ध्यान आकर्षण भएकाले तत्काल भट्टलाई रिहाइ नगरिए सङ्घर्षका कार्यक्रमहरू अघि लान बाध्य हुनेछौ, नेपाल स्वास्थ्यकर्मी सङ्घ डोटीका अध्यक्ष अर्जुन बलायर र सचिव प्रेम बहादुर कठायतद्धारा हस्ताक्षरित ज्ञापन पत्रमा भनिएको छ । परिवारका सदस्यले खोपकै कारण ज्यान गएको दाबी गरेका छन् । दिउसो २ बजे खोप लगाएर प्रवीणलाई घर लगिएको र राती सुतेको अवस्थामा मृत्यु भएको आफन्तले बताएका छन् । 
ज्ञापन पत्र बुझ्दै प्रमुख जिल्ला अधिकारी टेकनारायण पौड्याले सम्बन्धित ठाउँमा ज्ञापन पत्र समयमै पठाउने बताउनु भएको थियो ।