गौरा पर्वमा हुने भिडभाडमा रोक

धनगढी: दार्चुलामा गौरा पर्वमा हुने मानिसहरुको भिडभाडमा रोक लगाइएको छ। आगामी भाद्र महिनामा मनाइने सुदुरपश्चिमेलीहरुको महान पर्व गौरामा कोरोना भाइरस संक्रमणको जोखिमलाई मध्यनजर गर्दै मानिसहरुको भिडभाडमा रोक लगाइने भएको हो। शुक्रबार जिल्ला कोभिड–१९ सङ्कट व्यवस्थापन केन्द्रको बैठकले गौरामा मानिसहरुको भिडभाड हुनसक्ने भन्दै सामाजिक दुरीको अनिवार्य पालना गराउने निर्णय गरेको छ। स्वास्थ्यका मापदण्डको पालना गरी पर्व मनाउने तथा अनावश्यक भिडभाडजन्य कार्यहरुमा रोक लगाइने बताइएको छ।

त्यस्तै कोरोनाको संक्रमणबाट जोगाउन जिल्लाका सबै स्थानीय तहले निर्माण गरेका होल्डिङ सेन्टर, क्वारेन्टाइन र आइसोलेशनलाई व्यवस्थित गर्ने र निर्माण नगरेका स्थानीय तहमा तत्काल निर्माणका लागि पहल गर्ने निर्णय भएको दार्चुलाका प्रमुख जिल्ला अधिकारी सिद्धराज जोशीले बताए। जिल्लाभित्र कोरोनाको तेस्रो लहर फैलिन सक्ने अवस्थालाई ध्यानमा राखी सबै नागरिकहरुलाई सतर्क र सजग रहन अनुरोध गर्ने निर्णय गरिएको बताईएको छ।