मुम्बईमा एक दशकयताकै सर्वाधिक वर्षा, बाढी पहिरोको कारण ४० जनाको मृत्यु

मुम्बई : भारतको मुम्बईमा एक दशक यताकै धेरै वर्षा हुँदा विभिन्न स्थानहरुमा बाढी पहिरो गएको छ। वर्षाका कारण पर्खाल र रुखहरु ढलेको, गाडीहरु अनियन्त्रित हुँदा दुर्घटनामा परेको जस्ता घटनाहरुमा परि  ४० जनाको मृत्यु भएको बताइएको छ।

मुम्बईमा गएको ४८ घण्टामा मात्रै एक दशक यता कै धेरै वर्षा रेकर्ड भएको बताइएको छ।

वर्षाका कारण उत्पन्न उपस्थितिका कारण महाराष्ट्र सरकारले आज सार्वजनिक विदा दिएको छ भने मानिसहरुलाई आगामी दुई दिन सम्म घरमै रहन सुझाव दिइएको छ। मौसम हेरेर विदाको समय बढाउन सकिने बताइएको छ।

वर्षाका कारण सडक, हवाई र रेल सेवाहरु बन्द भएको छ भने कतिपय स्थानहरु डुबानमा परेका छन्।

राज्य सरकारले उद्धार कार्यलाई प्राथमिक्ता दिएको जनाएको छ।