५० बर्ष देखि बसेको भुमि भारतमा परेपछि कंचनपुरका स्थानीयले तोडफोड गरे सीमा स्तम्भ

कञ्चनपुर,चैत्र २ - कञ्चनपुरमा नेपाल भारत सिमा विवाद झन झन चुलिदै गएको छ । साढे पाँच दशकदेखि बस्दै आएको स्थानीयको जमिन भारतमा पर्न गएपछि सीमा विवाद चुलिदै गएको हो ।
नेपाली भूमिमा सीमा पिल्लर गाडिएको भन्दै आक्रोशित स्थानीयले सिमा पिल्लरमाथि तोडफोड गरेका छन् । कञ्चनपुरको बेलडाँडी गाउँपालिका ३ वैवाह क्षेत्रमा हालै नेपाल भारत संयुक्त सर्वे टोलीले निमार्ण गरेको ७८३/४ नम्बर पिल्लर स्थानियले हतौडा र ढुङ्गा प्रहार गरेर तोडफोड गरेका हुन ।
नेपाली काँग्रेस कञ्चनपुरका सभापति हरीप्रसाद बोहराले सरकारी लापरबाहीका कारण नेपाली भूमि भारतमा पार्न खोजिएको आरोप लगाए । उनले सो क्षेत्रको स्थलगत अनुगमनका लागि आफुहरु पुगेको र त्यहाँ पुग्नु अवागै पिल्लरमा तोडफोड भएको बताए ।
सीमा क्षेत्रका नागरिकको आक्रोश स्वभाविक रहेको बताउदै उनले ५ दशकदेखी नेपाली नागरिकले भोगचलन गर्दै आएको जमिन भारतमा पार्न खोजिएकोले यो सरासर सरकारको गैरजिम्मेवारीपूर्ण काम भएको आरोप लगाए । स्थानीयले लालपुर्जाधारी जमिनमा सीमा पिलर परेकाले त्यसको बिरोध गर्दै आएका थिए । स्थानियको विरोधपछि सर्वेको काम पनि रोकिएको थियो ।