कैलालीको वनवेहडा स्थित अमर माविमा आगामी माघ ११ गतेदेखि महायज्ञ सञ्चालन हुने 

कैलाली, पौष १३ - 
कैलालीको गौरीगंगा नगरपालिका ६ वनवेहडामा रहेको अमर माध्यमिक विद्यालयमा आगामी माघ ११ गतेदेखि १८ गतेसम्म विराट सप्ताह ज्ञान महायज्ञ सञ्चालन हुने भएको छ । 
२०२६ सालमा स्थापना भएको विद्यालयको शैक्षिक तथा भौतिक विकासका लागि महायज्ञ सञ्चालन गर्न लागिएको हो । 
विद्यालय स्थापनाको ५० वर्ष पुगेको उपलक्षमा स्वर्ण जयन्तीसहित महायज्ञ सञ्चालन गर्न लागिएको सोही विद्यालयमा आज आयोजित पत्रकार सम्मेलनमा मूल आयोजक समितिले जानकारी दिएको छ । 
साथै आज मूल ¥याली निकालेर गाउँ परिक्रमा समेत गरिएको थियो । 
मूल आयोजक समितिका संयोजक समाजसेवी वीर बहादुर शाहले विद्यालयलाई १२ सम्म सञ्चालन गर्नुपर्ने बाध्यात्मक परिस्थिति सिर्जना भएकाले  विद्यालयको भौतिक पूर्वाधार निर्माण सँगै शैक्षिक विकासका लागि महायज्ञ  सञ्चालन गर्न लागिएको बताए । 
पत्रकार सम्मेलनमा मूल आयोजक समितिका उप–संयोजक पुरन सिंह कडायतले यस क्षेत्रकै पुरो विद्यालय भएकाले उच्च शिक्षा तथा प्राविधिक शिक्षाका लागि बाहिर जानुपर्ने बाध्यतालाई कम गर्न महायज्ञ महत्त्वपूर्ण हुने बताए । 
विद्यालयका प्रधानाध्यापक उजिर सिंह कुँवरले खरिद गरिएको विद्यालयको जमिनको रकम समेत केही तिर्न बाँकी रहेकोले उक्त रकम मिनाहा सँगै विद्यालयको शैक्षिक विकासमा महायज्ञ महत्त्वपूर्ण हुने बताउनु भयो । 
यस अघि विद्यालयको जमिन खरिदका लागि रानीफाँटा सामुदायिक बनले ११ लाख ११ हजार १ सय ११ रकम सहयोग गरेको थियो । त्यस्तै नवदुर्गा सामुदायिक बनले १० लाख र भैरव महिला सामुदायिक बनले १ लाख  सहयोग गरेको थियो । 
आज पत्रकार सम्मेलनमा महायज्ञ सञ्चालनको सहयोगार्थ वडा नम्बर ६ का अध्यक्ष कमला शर्माले मूल आयोजक समितिलाई एक लाख ५१ हजारको चेक हस्तान्तरण गर्नु भयो । 

अमर माध्यमिक विद्यालयमा हाल १० सम्मको पढाई हुँदै आएको छ । 
महायज्ञ सञ्चालनका लागि ११ वटा उप समिति गठन गरिएका छन् । जसमा प्रचार प्रसार उप समितिको संयोजकमा चक्र बोगटी, कलश संरक्षण तथा व्यवस्थापन उप समिति संयोजक सिद्ध राज जोशी, सङ्घ संस्था समन्वय उप समितिको संयोजकमा दान बहादुर कुँवर, राजनीतिक दल समन्वय उप समितिका संयोजक कृष्ण प्रसाद ओझा तोकिएका छन् । त्यस्तै आर्थिक सङ्कलन उप समितिको संयोजक हेमराज सुवेदी, स्वयंसेवक परिचालन उप समितिको संयोजकमा बहादुर खड्का, मण्डप निर्माण उप समिति संयोजकमा तुलसीराम चौधरी, वडा, गाउँपालिका, नगरपालिका समन्वय उप समिति संयोजक ६ नम्बर वडाध्यक्ष कमला शर्मा, सरसफाइ उप समिति संयोजकमा रामविलाश चौधरी, योग उप समिति संयोजकमा खगेन्द्र प्रसाद जोशी र सूचना तथा सञ्चार उप समितिको जिम्मेवारी सुरत रावत ‘डोटेली कान्छा’लाई दिइएको छ । 
महायज्ञमा सु–प्रसिद्ध नव युवा कथा वाचक अमृत शरण देवाचार्यलेसंगितमय तथा लिलामय श्रीमद्भागवत कथा वाचन गर्ने मूल आयोजक समितिले जनाएको छ । 
महायज्ञको माघ ११ बिहान शान्तिकलश यात्रा गरी दिउँसो १ बजे उद्घाटन गरिने छ । महायज्ञ सञ्चालनका लागि २० लाख खर्च लाग्ने अनुमान र ४८ लाख आम्दानी अपेक्षा गरिएको छ ।