सुदूरपश्चिमको पहाडमा फेरि हिमपात, यो बर्ष छैटौं पटक पर्‍यो हिउँ

बैतडी, २४ फागुन — लगातारको वर्षाका कारण बैतडीसहित सुदूर पहाडका उच्च क्षेत्रमा हिमपात भएको छ । बैतडीसहितका पहाडी जिल्लाका उच्च लेकाली क्षेत्रमा फेरि हिमपात भएको हो । बिहीबारदेखि मौसममा आएको परिवर्तनसँगै शुक्रबार राति उच्च लेकाली क्षेत्रमा हिमपात भएको हो । बैतडीका खोड्पे, श्रीभावर, गर्जे लगायतका उच्च क्षेत्रमा हिमपात भएको छ ।
यो वर्ष लगातारको वर्षा र हिमपातले अझै पनि चिसो कम हुन सकेको छैन । चिसोले गर्दा यो समयसम्म पनि लेकाली क्षेत्रका मानिसको जनजीवन प्रभावित भएको छ । यो वर्ष फागुन अन्तिम सातासम्म हिमपात नरोकिएपछि उच्च लेकाली क्षेत्रमा चिसोले जनजीवन कष्टकर भएको सिगास गाउँपालिकाका चक्रसिंह साउदले बताए । वर्षा र हिमपातले अत्यधिक चिसो बढ्दा बाहिर निस्कनसमेत मुस्किल भएको उनले बताए ।