गजल: म भन्दिनँ तिमीलाई मसँग प्रेम गर्ने तिम्रो हक छैन......

गजल

म भन्दिनँ तिमीलाई मसँग प्रेम गर्ने तिम्रो हक छैन
यत्ति भन्छु तिम्रो हितका निम्ति,म तिम्रो लायक छैन

श्रृङ्गारको सिप नलाग्ने रहेछ मन खुसी नभएपछि
प्रेमीसँग छुट्टिएकी बेहुलीको अनुहारमा चमक छैन

शहरमा हर दिन जुलुस निस्किन्छ रोजगारी माग्नेको
वर्षौं भयो यो विकट गाउँको स्कुलमा शिक्षक छैन

तिमी महलको सपना देख्छ्यौ कारको सपना देख्छ्यौ
पैदल जानुपर्छ मेरो झुपडीसम्म पुगेको सडक छैन

त्यो दिनदेखि मैले आफैँलाई मृत घोषणा गरेको हुँ
जुन दिन भन्यौँ तिमीले तिमी हुनु र नहुनुमा फरक छैन ।

© साधु भाइ