डाेटीकाे केआइसिंहमा नयाँ भाडा दर कायम

भदौ ३० , डोटी | दिपायल देखी केआईसिंहको वायलसम्मको सार्वजनिक यातायातको नयाँ भाडा दर कायम भएको छ । केआईसिंह गाउँपालिका, यातायात व्यवसायी र सरोकार पक्षबिच शुक्रवार बसेको बैठकले दिपायल देखी वायलसम्मको भाडा एक सय ६१ रुपैयाँ तोकेको छ ।
यातायात व्यवसायीले यसअघि दिपायलदेखि वायलसम्मको ३ सय भाडा लिँदै आएका थिए । गाउँपालिकाले आयोजना गरेको बैठकले कालोपत्रे सडकमा प्रति किलोमिटर रु ७ र कच्ची सडकमा रु १२ दशमलव ५ भाडा दर कायम गरेको अध्यक्ष लोकेन्द्र बहादुर शाहीले जानकारी दिए । वायलसम्मको सडक कालोपत्रे भइसकेको भए पनि यातायात व्यवसायीहरूले कच्ची सडक भएको बेला तोकिएको दररेटमा चर्को भाडा लिने गरेको भन्दै जनदबाब बढ्दै गएको थियो ।
प्रदेश सरकारले कायम गरेको भाडा दर अनुसार बैठकले कायम गरेको नयाँ भाडा दर सबै खालेका सार्वजनिक यातायातमा लागु हुने बताइएको छ । साथै असोज १ गते देखी दिपायलबाट दैनिक एक बस वायलका लागि छुट्ने निर्णय भएको छ । दिपायल देखि वायलसम्म एक दिन शैलेश्वरी डोटी सार्वजनिक प्रालीको र अर्को दिन सुन्दर सुदूरपश्चिम सार्वजनिक यातायात प्रालीको एउटा बस अनिवार्य छुट्ने बताइएको छ ।