अवैध तरिकाले रुख काटेको आरोपमा बेलौरी ६ का वडाध्यक्ष पक्राउ

महेन्द्रनगर । अवैध तरिकाले रुख काटेको आरोपमा कञ्चपुरको बेलौरी नगरपालिका ६ का वडाध्यक्ष पक्राउ परेका छन् । अनुमति विना रुख कटान गरेको आरोपमा वडा अध्यक्ष भोजराज चौधरी हिजो (आइतवार) पक्राउ परेका हुन् । 

बेलौरीस्थित वर्षौदेखि बन्द छोटी भन्सार क्षेत्रमा केही दिन अघि गरिएको सरसरफाईका क्रममा काटिएका रुखलाई लिएर वडा अध्यक्ष चौधरीलाई पक्राउ गरिएको हो । सरसफाइको क्रममा काटिएका रुखलाई लिएर डिभिजन वन कार्यालयले वडा अध्यक्ष चौधरीलाई पत्र पठाएको थियो । डिभिजन वनको पत्रका आधारमा जवाफ दिन आएका चौधरीलाई पक्राउ गरी हिरासतमा राखिएको हो ।

भन्सार क्षेत्र सरसफाई कार्यक्रममा उप मेयर जोगराम चौधरी लगायतका अन्य जनप्रतिनिधि, स्थानीय सहभागी भएका थिए । सरसफाईमा सहभागी उप मेयर चौधरीले आफूले पनि रुख नकाट्न सल्लाह दिएको प्रतिक्रिया दिएका छन् । सरसफाईका क्रममा भन्सार क्षेत्रमा रुख काटिएपछि उनी विरुद्ध डिभिजन वन कार्यालयमा उजुरी दिइएको थियो । त्यस उजुरीका आधारमा डिभिजनले उनलाई रुख कटान सम्बन्धि पत्र पठाएको थियो ।

डिभिजन वनले हिरासतमा राखेर चौधरीमाथि अनुसन्धान अघि बढाएको छ ।

चौधरी २०७९ को स्थानीय तह निर्वाचनमा उनी नेकपा एमालेबाट वडा अध्यक्ष निर्वाचित भएका थिए ।