एलपिएल ८ औं संस्करणको  प्रबर्द्धकमा धनगढी उपमहानगरपालिका वडा नम्बर २

धनगढी । धनगढीमा हुने एलपिएल ८ औं संस्करणको प्रबर्द्धकमा धनगढी उपमहानगरपालिका वडा नम्बर २ जोडिएको छ।

यहि मङ्सिर ९ गते देखि २३ गते सम्म धनगढी स्थित फाप्ला क्रीकेट मैदानमा आयोजना हुने आठौं संस्करणको लिटल फ्लावर प्रीमियर लिग सिनियर क्रीकेट प्रतियोगिताको प्रबर्द्धकमा धनगढी उपमहानगरपालिका वडा नम्बर २  जोडिएको हो ।

सम्झौता पत्रमा धनगढी वडा नम्बर २ का वडा अध्यक्ष धर्मराज ओझा र लिटल फ्लावर स्पोर्ट्स क्लबका अध्यक्ष रामचन्द्र शाहीले हस्ताक्षर गरेका हुन्। 

प्रतियोगिता आठौं संस्करण धनगढी स्थित फाप्ला क्रिकेट मैदानमा संचालन हुने छ । प्रतियोगिताको विजेताले नगद दुई लाख पचपन्न हजार पाँच सय पचपन्न तथा उपविजेताले एकलाख अठ्ठाईस हजार नगद तथा ट्रफी, मेडल र प्रमाणपत्र प्राप्त गर्ने छन ।  प्रतियोगितामा सर्वोत्कृष्ट खेलाडीले नगद  १५ हजार, उत्कृष्ट बलरले नगद रु ७ हजार पाँच सय उत्कृष्ट ब्याटरले  नगद ७ हजार पाँच सय प्राप्त गर्ने छन । 

खेलको प्लेयर अफ द म्याचले नगद रु  १ हजार पाँच सय र प्रतियोगिताको उदियमान  खेलाडीले  ५ हजार नगद पुरस्कारका साथै ट्रफी, मेडल र प्रमाणपत्र प्राप्त गर्ने छन । सम्पुर्ण खेलहरु राष्ट्रिय टेलिभिजन न्यूज नेपाल   टेलिभिजन एचडी द्वारा प्रसारण  गरिने आयोजकले जनाएको छ । 

२०७३ मा माघ ५ गते देखि माघ १६ गते सम्म यस प्रतियोगिताको पहिलो संस्करण सम्पन्न भएको थियो। यो प्रतियोगिता प्रत्येक वर्ष संचालन हुने गर्दछ । यस वर्ष १६ वटा टिमले  सहभागिता जनाउने छन्।

प्रतियोगितालाई सहयोग गरेकोमा अध्यक्ष शाहीले धनगढी उपमहानगरपालिका वडा नम्बर २ कार्यालय परिवारलाई धन्यवाद ज्ञापन गर्नुभएको थियो ।