धनगढीमा खाना महोत्सव हुने

धनगढी – कैलालीको धनगढीमा ‘प्रथम सुदूरपश्चिम खाना महोत्सव २०७६’ हुने भएको छ । सोमवार धनगढीमा पत्रकार सम्मेलनको आयोजना गर्दै फागुन १४ गतेबाट २० सम्म धनगढीको खुल्ला मञ्चमा खाना महोत्सव आयोजना हुने जानकारी दिईएको हो । खाना महोत्सवको उद्घाटन राष्ट्रपति विद्यादेवी भण्डारीले गर्ने आयोजक होटेल व्यवसायी सङ्घ कैलालीले जनाएको छ ।

महोत्सवको तयारी अन्तिम चरणमा पुगिसकेको होटेल व्यवसायी सङ्घ कैलालीका अध्यक्ष कलम बमले जानकारी दिए । सुदूरपश्चिम प्रदेशका परम्परागत खानाहरूको प्रवर्द्धनका लागि महोत्सव आयोजना गर्न थालिएको उनले बताए ।

महोत्सवमा एक हजार लिटरको भाँडामा फाणो पकाउने तयारी समेत आयोजकको छ । खाना महोत्सवमा परम्परागत खानाका परिकार जौ, कोदो, फापर सँगै विभिन्न समुदायमा प्रचलित खानाका परिकार रहने छन् ।