डोटीको क्वारेन्टिनमा मृत्यु भएका युवकको कोरोना रिपोर्ट नेगेटिभ

डोटी, जेठ २६ - डोटीको केआई सिंह गाउँपालिका वडा नम्बर ३ मा आइतबार क्वारेन्टाइनभित्रै मृत्यु भएका १९ वर्षे युवकको पिसिआर परीक्षण नतिजा ‘नेगेटिभ’ आएको छ । उनको पिसिआर नतिजा नेगेटिभ आएको सुदूरपश्चिम प्रदेश सभा सदस्य पूर्णा जोशीले  जानकारी दिइन् । मृतक युवाको कोरोना परीक्षणका लागि आइतबार नै स्वाव संकलन गरी धनगढी पठाईएको थियो ।

मृतक युवा भारतबाट आएर जेठ २० गतेदेखि सिताराम आधारभूत विद्यालयमा बनाइएको क्वारेन्टाइनमा थिए । आइतबार बिहान ३ बजेको समयमा एक्कासी समस्या बढेर उनको क्वारेन्टाइनभित्रै मृत्यु भएको थियो । केआई सिंह गाउँपालिका वडा नम्बर ३ दल्ल स्थायी घर भएका मृतक युवालाई झण्डै १३ वर्षदेखि मुटु सम्बन्धी रोगको समस्या भएको परिवार स्रोतले जनाएको छ ।

 प्रहरीले निगरानीमा राखेको मृतक युवाको शव अन्त्यष्टीका लागि अब परिवारको जिम्मा दिईने स्वास्थ्य कार्यालय डोटीका प्रमुख रमेश मलासीले जानकारी दिए । छोरालाई क्वारेन्टाइनभित्रै स्वास्थ्यमा जटिल समस्या आएपछि आफु पनि क्वारेन्टाइनभित्रै बसेर छोराको स्याहार गर्ने भनि पुगेका मृतक युवाका बुबा अहिले पनि क्वारेन्टाइनमा छन् ।

गाउँमै बस्ने उनले मृतक छोरासँग सम्पर्क गरेको हुँदा उनको पनि पिसिआर परिक्षणका लागि धनगढी स्थित प्रयोगशालामा पठाईएको थियो । सो क्वारेन्टाइनमा रहेका ३ महिला सहित ११ जनाको स्वाव धनगढी पठाईएकोमा मृतक युवा बाहेकको नतिजा आईसकेको छैन ।