डोटीमा नागरिकता लिनेहरुको संख्या घट्यो

साउन ७,२०७७
मोहन पनेरू, डोटी
डोटी जिल्लाबाट आर्थिक वर्ष २०७६।०७७ मा नेपाली नागरिकता लिनेको संख्या गत वर्षको भन्दा आधा रहेको जिल्ला प्रशासन कार्यालयले जानकारी दिएको छ ।
गत आर्थिक बर्षमा उक्त कार्यालयबाट ७ हजार ३ सय ६५ जनाले नेपाली नागरिकताको प्रमाण पत्र वितरण भएकोमा गएको आर्थिक वर्ष २०७६।०७७ मा त्यो संख्या घटेर ३ हजार १ सय ७६ मा पुगेको हो ।
विश्वभर महामारीको रुपमा फैलिएको कोभिड १९ का कारण मुलुकभर लकडाउन चलेकोले बैशाख र जेठ महिनाभर उक्त कार्यालयले नेपाली नागरिकता वितरण गर्न सकेन भने असारमा सरकारले लकडाउनलाई खुकुलो पारे संगै ४६ जनालाई नेपाली नागरिकता वितरण गरेको बताएको छ।

सो कार्यालयबाट २०७६ मंसिर महिनामा सबै भन्दा बढी नेपाली नागरिकता वितरण भएको देखिएको छ । उक्त महिनामा ८ सय ८० जनाले नेपालीले नेपाली नगरिकताको प्राणपत्र लिएका छन् ।

श्रावण महिनामा ४ सय ३३ जना, भाद्रमा ३ सय ८० जनाले नागरिकता बनाएको तथ्यांक उक्त कार्यालयमा रहेको छ । त्यस्तै असोज महिनामा २ सय १५, कार्तिकमा ४ सय २० जनाले नेपाली नगरिकता लिएको उक्त कार्यालयले जानकारी दिएको छ । त्यस्तै पौषमा ३ सय ४० जना, माघमा १ सय ८५ जना, फागुनमा २ सय २५ जना र चैत्र महिनामा ७० जनाले नेपाली नगरिकता लिएका छन् ।

आर्थिक वर्ष २०७६।०७७ को समाप्ति सम्म उक्त कार्यालयबाट ४ जनाले बैबाहिक अंगिकृत नागरिकता प्राप्त गरेका छन् भने आर्थिक वर्ष २०७५।०७६ आर्थिक वर्षमा जिल्ला बाट ३ जनाले बैबाहिक अंगीकृत नागरिकता प्राप्त गरेका थिए ।