आश बोकी जानेहरु लाश बनि आँउदा : मलेसियाबाट एकै दिन २४ नेपालीको शव र अस्तु नेपाल ल्याइयो

धनगढी – शनिवार एकै दिन मलेसियाबाट २४ जना नेपालीको शव र अस्तु नेपाल आई पुगेको छ । रोजगारीको सिलसिलामा मलेसियामा गएका र विभिन्न समयमा मृत्यु भएका नेपालीहरूको शव र अस्तु नेपाल वायुसेवा निगमको वाइड बडी विमानले ल्याएको हो ।

वैदेशिक रोजगार बोर्डले मलेसियाबाट नौ वटा शव र १५ वटा अस्तु गरी २४ युवकको शव आइपुगेको जनाएको छ । कोभिडका कारण नियमित उडान हुन नसक्दा शव सङ्कलन गरी एकै पटक ल्याइएको पनि बोर्डले जनाएको छ ।

९ वटा शव विमानस्थलबाटै मृतकका घरसम्म पठाइएको र अस्तु भने सम्बन्धित मृतकका आफन्तलाई डाकेर विमानस्थलमा जिम्मा लगाइने पनि बोर्डले जनाएको छ । झन्डै दुई दशक यता देशको आर्थिक मेरुदण्डको रूपमा रेमिटेन्स रहँदै आएको छ ।

तर विदेशमा कमाउन गएकाहरू भने शवको रूपमा फर्कने क्रम पनि बढ्दो छ । औसत दिनमा ३ वटा शव विदेशबाट आउने गरेको तथ्याङ्क वैदेशिक रोजगार बोर्डसँग रहेको छ ।

बोर्डको तथ्याङ्कअनुसार गत आर्थिक वर्षमा १ हजार २४२ जना नेपालीले विदेशमा ज्यान गुमाएका छन् । यस्तो सङ्ख्या अघिल्लो वर्ष ६७४ जना मात्रै थियो ।