कैलालीको मोहन्याल गाउँपालिकाकी कार्यवाहक अध्यक्ष बुढामगरले पनि रोजिन् एकीकृत समाजवादी 

धनगढी - 

नेकपा एमाले विभाजन पछि माधव कुमार नेपाल नेतृत्वमा दर्ता भएको नेकपा (एकीकृत समाजवादी)को पक्षमा सनाखत गर्ने जनप्रतिनिधिको सङ्ख्या बढ्दै गएको छ । बुधवार(आज) कैलालीको मोहन्याल गाउँपालिकाका कार्यवाहक अध्यक्ष पूजा देवी बुढामगरले पनि एकीकृत समाजवादीको पक्षमा सनाखत गरेकी छन् । उनीसहित मोहन्यालकै कार्यपालिका सदस्य विशाल पहराइ, वडा सदस्य चन्द्रकला कामी गरी तीन जनाले माधव नेतृत्वको नवगठित दल रोजेका हुन् । 

सनाखत पछि प्रतिक्रिया दिँदै कार्यवाहक अध्यक्ष बुढामगरले एमालेमा ओलीको अहङ्कारका विरुद्ध आफूले नयाँ दल रोजेको बताइन् । यस अघि मङ्गलवार सुदूरपश्चिम प्रदेश सभाका १० सांसदले समाजवादीको पक्षमा सनाखत गरेका थिए भने थप तीन जनाले बिहीबार सनाखत गर्ने बताएका छन् । यो सङ्ख्या थप बढ्न सक्ने एक सांसदले बताए ।