सुदूरपश्चिमका आठमध्ये सात समानुपातिक सांसद एकीकृत समाजवादीमा

धनगढी, २२ भदौ । सुदूरपश्चिम प्रदेशमा एमालेबाट निर्वाचित सात समानुपातिक सांसदले नेकपा एकीकृत समाजवादी पार्टी रोजेका छन् । सुदूरपश्चिम प्रदेशमा सभामुखसहित एमालेका २५ सांसद थिए । तीमध्ये ८ जना समानुपातिक सांसद हुन् ।

पहिलो चरणमा मंगलबार १० जना सांसदले नेकपा एसको पक्षमा सनाखत गरेका थिए । तीमध्ये आन्तरिक मामिला तथा कानून मन्त्री पूर्णा जोशी, भौतिक पूर्वाधार विकास राज्यमन्त्री चुनकुमारी चौधरी, सामाजिक विकास राज्यमन्त्री मना साउद, प्रमुख सचेतक दुर्गा विक, सांसद सुशीला बुढाथोकीले सनाखत गरेका थिए ।

सोमबार थप एक समानुपातिक सांसद माया तामाङ बोहराले पनि नेकपा एसको पक्षमा सनाखत गरेकी हुन् । मंगलबार सनाखत गरेका ६ जना यसअघि पनि माधव नेपाल पक्षमै थिए । तर, सोमबार सनाखत गरेकी तामाङ भने यसअघि ओली पक्षमा थिइन् ।

उनले मुख्यमन्त्रीले विश्वासको मत लिने बेलामा पनि विपक्षमा मतदान गरेकी थिइन् । अहिलेसम्म एमालेबाट निर्वाचित समानुपातिक सांसद अर्चना गहतराज मात्रै एमालेमा छिन् । उनी आर्थिक मामिला तथा योजना राज्य मन्त्री हुन् । उनले यसअघि नै एमाले छोड्न नसक्ने बताएकी छन् ।

एमालेमा १७ जना प्रत्यक्ष निर्वाचित सांसद हुन् । तीमध्ये भौतिक पूर्वाधार विकास मन्त्री दीर्घ सोडारी, सामाजिक विकास मन्त्री लालबहादुर खड्का, पूर्व उद्योग वन तथा वातावरण राज्य मन्त्री प्रकाश रावल, पूर्वप्रमुख सचेतक तारा लामा तामाङ, सांसद कुलवीर चौधरी, अमर साउद र बलबहादुर सोडारीले नेकपा एसमा सनाखत गरिसकेका छन् ।

सोमबारसम्म नेकपा एसमा समानुपातिक ७ सहित १४ सांसदले सनाखत गरेका छन् । १४ सांसदले सनाखत गरेसँगै नेकपा एस प्रदेशको सबै भन्दा ठूलो दल बनेको छ । यहाँ माओवादीका १३, कांग्रेसका १२, एमालेका ११ र जनता समाजवादी पार्टीमा २ सांसद छन् ।