मोहन्याल गाउँपालिकामा अख्तियारको छापा
२४ असोज/ कैलालीको मोहन्याल गाउँपालिका कार्यालयमा अख्तियार दुरुपयोग अनुसन्धान आयोगको एक टोलीले छापा मारेको छ ।
गाउँपालिकाबाट आर्थिक अनियमितता भए, गरेको उजुरी परेपछि शुक्रबार टोली नै पठाएर अनुसन्धान सुरु गरिएको अख्तियार दुरुपयोग अनुसन्धान आयोगको कञ्चनपुरस्थित कार्यालयले जनाएको छ ।
गाउँपालिकाले सञ्चालन गरेको विभिन्न विकास निर्माण आयोजनामा आर्थिक अनियमितता भएको भन्ने प्राप्त सूचना तथा उजुरीका आधारमा अनुसन्धान टोली पठाइएको अख्तियार कार्यालय कञ्चनपुरका सूचना अधिकारी शाखा अधिकृत हरिशचन्द्र जोशीले जानकारी दिनुभयो ।
‘निर्माण, ठेक्काट्टासंग सम्बन्धित उजुरी परेको थियो । आवश्यक सोधपुछ र कागजात माग गरेका थियौं, उहाँले भन्नुभयो, ‘टोलि दुई दिनपछि फर्किएको छ ।एकदिन त्यही बसेर सोधपुछ, कागजात हेर्ने र बुझ्ने काम गरेका थियौं । अलिकति विस्तृत किसिमको उजुरी भएकाले कार्यालयका कागजात लिएर टोली फर्किएको छ । थप अनुसन्धान प्रक्रियालाई अघि बढाउछौँ ।’
यसअघि प्रारम्भिक रूपमा लिखित स्पष्टीकरणसहित जवाफ माग गरिएको र छानबिन प्रभावकारी बनाउन अख्तियारले टोली पठाएर कागजपत्र झिकाएको उहाँको भनाइ छ ।
गाउँपालिकामा विभिन्न शीर्षकमा आर्थिक अनियमितता, मिलेमतो, ठेक्कापट्टा लगायत निर्माणमा गुणस्तरीयता नभएको र अन्य यस्तै आयोजनाका विषय उजुरी परेकाले अनुसन्धान गरिएको सूचना अधिकारी जोशीले बताउनुभयो । छानबिन गरि अख्तियारले रायसहितको प्रतिवेदन आयोगको केन्द्रीय कार्यालय पठाउने जनाएको छ ।