बजेटको पहिलो उपहार महँगी : बढ्यो पेट्रोलको मुल्य

काठमाडौ, जेठ १६ - बजेटमा पूर्वाधार कर बढाएपछि नेपाल आयल निगमले पेट्रोलियम पदार्थको मूल्य बढाएको छ। अर्थमन्त्री डा।युवराज खतिवडाले आगामी आर्थिक वर्षको बजेटबाट पेट्रोल र डिजलमा प्रतिलिटर थप एक रुपैयाँ पूर्वाधार कर लगाउने घोषणा गरेको केही घण्टा नवित्दै निगमले मूल्य बढाएको हो।

निगमले पेट्रोल,डिजल र मट्टितेलमा प्रतिलिटर डेढ रुपैयाँ मूल्य बढाएको हो।निगमका उपनिर्देशक विनितमणि उपाध्यायले पूर्वाधार कर बढेपछि तेलको मूल्य बढाइएको जानकारी दिए।‘सरकारले पूर्वाधार कर बढाएपछि हामीले पनि मूल्य बढाएका हौं’ उनले बिजमाण्डूसँग भने। सरकारले थप एक रुपैयाँ बढाएर सडक निर्माणमा लगाउने घोषणा गरेको छ।
तीन वर्षअघि तात्कालिन अर्थमन्त्री विष्णु पौडेलले बुढीगण्डकी जलविद्युत आयोजना स्वदेशी लगानीमा बनाउने भन्दै पेट्रोल र डिजलमा प्रतिलिटर चार रुपैयाँ पूर्वाधार कर लगाउन सुरु गरेका थिए। त्यो बेलामा निगमले तत्कालै तेलको मूल्य बढाएको थिएन्। अहिले भने हतारहतार निगमले बजेटमा लगाएको शुल्क भन्दा पचास पैसा बढी मूल्य बढाएको छ।नयाँ मूल्यसँगै पेट्रोल १ सय ११ रुपैयाँ र डिजल तथा मट्टितेल साढे ९८ रुपैयाँ कायम भएको छ। राष्ट्रिय योजना आयोगको उपाध्यक्षमा अहिलेका अर्थमन्त्री खतिवडा थिए।