सुदूरपश्चिम प्रदेश सरकारको कामकारबाही बाट जनता निराश : केन्द्रिय सदस्य महर

धनगढी,२० पुष / नेपाली कांग्रेसका केन्द्रिय सदस्य नैनसिंह महरले सुदूरपश्चिम प्रदेश सरकारको कामकारबाहीबाट जनता निराश भएको बताएका छन् । नेपाल प्रेस युनियन कैलालीले धनगढीमा आयोजना गरेको पत्रकार सम्मेलनलाई सम्बोधन गर्दै नेता महरले प्रदेश सरकारले जनताको पक्षमा काम गर्न नसक्दा रुष्ठ भएको बताएका हुन् ।

‘प्रदेश सरकार भ्रष्टाचारमा लिप्त छ । कार्यकर्ता पाल्ने, आसेपासेलाई फाइदा दिनबाहेक जनताका आधारभुत आवश्यकता पुरा गराउनतर्फ केन्द्रित भएको छैन’ उनले भने,‘यो सरकार जनताको अधिकार, विकासको विपक्षमा छ ।’ उनले प्रदेश सरकार यथाशिघ्र फेरबदल गर्नुपर्ने बताए ।

‘संघमा पाँच दलको गठबन्धनको सरकार रहेको छ । प्रधानमन्त्रीमा नेपाली कांग्रेसकै सभापति रहेका छन्’ उनले भने –‘सुदूरपश्चिम प्रदेशमा कांग्रेसलाई प्रमुख प्रतिपक्षीमा राख्नु र सरकारमा सहभागिता नगराउनु यो सरकारको दुर्भाग्य हो ।’

उनले आफुहरुले प्रधानमन्त्री तथा पार्टी सभापति देउवालाई सुदूरपश्चिम प्रदेश सरकारको काम गराई शैली उचित नभएको र फेरबदल गर्नुपर्ने भनि सुझाव दिँदै आएको बताउँदै अब पुनः काठमाडौं गएपछि यस विषयमा प्रधानमन्त्रीसँग छलफल गर्ने बताए ।

नेता महरले आफु राष्ट्रिय योजना आयोगको टोलीसँग प्रदेशका नौ वटै जिल्लामा जाँदा विकासको दृष्टिकोणमा प्रदेश अत्याधिक पछि रहेको पाएको बताए । उनले भने –‘पश्चिम सेती परियोजना, बझाङको ताक्लाकोट जोड्ने सडक, फास्ट ट्रयाक, पञ्चेश्वर आयोजना, गेटा विमानस्थलको स्तरोन्नति तथा सुदृढीकरण लगायतका योजनाको कार्य यो सरकारले यथाशिघ्र सम्पन्न गर्नुपर्ने छ ।’ उनले गेटा मेडिकल कलेजको काम सम्पन्न भएपनि सञ्चालन हुन नसकेको बताए ।

‘मेडिकल कलेजको भौतिक संरचना निर्माण भइसकेका छन । यसलाई प्रतिष्ठान, मेडिकल कलेज वा सुदूरपश्चिम विश्वविद्यालय मातहात सञ्चालन गर्ने भन्ने तीन विकल्पको छलफल भएका रहेछन’ नेता महरले भने –‘मेरो व्यक्तिगत विचारमा यसलाई छुट्टै मेडिकल युनिभर्सिटी बनाउनुपर्छ । यो नेपालमै पहिलो हुने छ ।’

उनले प्रदेशका सात वटा पहाडी जिल्लाको विकासलाई सरकारले ध्यानमा राख्नुपर्ने बताए । ‘प्रदेशको राजधानी डोटीबाट धनगढी सारिएपछि त्यहा रहेका कार्यालयहरु पनि तराईमै सारिएका छन । त्यहा“ बनेका भौतिक संरचना प्रयोगविहिन छन’ उनले भने –‘अहिले तराइको विकास भइरहेकाले पहाडको जनसंख्या तराईमै बसाईसराई गरिरहेका छन । पहाडको विकास नभएसम्म बसाईसराई रोक्न सकिदैन ।’

प्रदेशमा केही दिन आएको बाढी पहिरोका कारण प्रभावित परिवारले अहिलेसम्म राहत पाउन नसकेको गुनासो आएको बताए । प्रदेशका अधिकांश व्यक्तिहरुले तटबन्धनको माग गरिरहेका छन् ।