vivo

‘म त सुसाइड गर्ने हो भन्थिन्, जिस्केको ठान्यौं’

May 10, 12:48

काठमाडौं २७ वैशाख /  १३औं दक्षिण एसियाली खेलकुदमा नेपालका लागि ऐतिहासिक स्वर्ण जितेकी भारत्तोलन खेलाडी सञ्जु चौधरीले ‘आत्महत्या’ गरेपछि समग्र खेलकुदवृत्त स्तव्ध छ ।

प्रशिक्षक सञ्जय महर्जनको घरमा बस्दै आएकी सञ्जुले सोमबार राति सोही घरको भुइँतलाको कोठामा सलको पासो लगाएर ‘आत्महत्या’ गरेकी हुन् । प्रहरीले मुचुल्का उठाएर शव पोष्टमार्टमका लागि पाटन अस्पताल पुर्‍याएको छ ।

६ महिनाअघि नेपाल प्रहरीको जागीर छाडेर बसेकी सञ्जु एसियाली खेलकुदका लागि राष्ट्रिय टोलीमा छानिएकी थिइन् । १३औं सागमा स्वर्ण जित्ने पहिलो महिला भारत्तोलन खेलाडीको कीर्तिमान राखेकी उनको लक्ष्य एसियाली खेलकुदमा शीर्ष पाँचभित्र पर्ने थियो । अर्थात्, उनी आफ्नो करिअरमा सकारात्मक थिइन्, एसियाड सफलताको लक्ष्य निर्धारण गरेकी थिइन् ।

मंगलबार विहानै आगोसरी फैलिएको उनको मृत्युको समाचारले उनका साथी खेलाडीहरु सबैभन्दा स्तब्ध छन् । केहि समययता पारिवारिक र व्यक्तिगत तनावको संकेत पाएका खेलाडीहरु उनलाई बुझ्न नसकेकोमा पछुतो गर्दैछन् ।

नेपाल पुलिस क्लबबाट सँगै खेलेकी टीका गुरुङले सञ्जुलाई बहादुर र आत्मविश्वासले भरिएको खेलाडीका रुपमा चिन्छिन् । टीकाका अनुसार पुलिसको जागिर छाडेपछिको समयमा सञ्जुको व्यवहार केहि भिन्न थियो, उनी केहि दुब्लाएकी थिइन् ।

‘जागीर छाडेपछि कमाइ पनि भएन भन्नेखालको चिन्ता सुनाएकी थिइन् । हामीले उनलाई धेरै सम्झाएका थियौं,’ टीकाले अनलाइनखबरसँगको कुराकानीमा भनिन्, ‘अरु कुराहरु पनि केहि छ कि भनेर सोध्दा मेरो व्यक्तिगत कुरा हो भन्थिन् ।’

सञ्जुले नजिकका साथीभाइसँग आफूले आत्महत्या गर्ने पनि बताएको टीकाले पुष्टि गरिन् । ‘उसले भनेको त थियो तर मजाकमा होला भनेर खासै ध्यान दिएनौं । साँच्चिकै रहेछ भन्ने त्यतिबेला बुझ्न सकिएन । नत्र प्रशिक्षक र संघका सरहरुलाई पनि खवर गर्ने थियौं,’ टीकाले भनिन् ।

नेपाल पुलिस क्लबकै सिनियर खेलाडी तारादेवी पुनले सञ्जुले ‘आत्महत्या’ गरेको विश्वास नै नलागेको बताइन् ।

‘म चुनावी जिम्मेवारीका कारण काभ्रेको तेमालमा छु । बिहानै यो समाचार सुन्नुपर्दा मेरो दिन नै खराव भएको छ,’ ताराले अनलाइनखबरसँग भनिन्, ‘मभन्दा धेरै जुनियर भएको हुनाले उनीसँग मेरो निकट कुराकानी त हुँदैनथ्यो । तर, मैले उनलाई जसरी चिनेको छु, उनी आत्महत्याको बाटो रोज्ने मान्छे नै होइनन् । उनी त बहादुर, आत्मविश्वासी र सकारात्मक सोच भएको मान्छे थिइन् । के कारणले यस्तो अवस्था आयो, राम्रो छानबिन हुनुपर्छ ।’

पुलिसको जागीर छाडेपछि भारत्तोलनका प्रशिक्षक र डाइट न्युट्रिसियनसमेत रहेका सञ्जय महर्जनले सञ्जुलाई आश्रय दिएका थिए । एशियाली खेलकुदमा छनोट भएपछि ललितपुरको लुभुस्थित महर्जनको घरमा बसेर उनले तयारी गरिरहेकी थिइन् ।

सातौं राष्ट्रिय खेलकुदमा खेलको नियम नबुझेर अयोग्य भए पनि महर्जनले नै उनको क्षमता पहिचान गरी प्रशिक्षणका लागि काठमाडौं ल्याएका थिए । आफूलाई च्याम्पियन बनाउन महर्जनको सबैभन्दा ठूलो सहयोग रहेको सञ्जुले अघिल्लो साता  प्रष्ट पारेकी थिइन् ।

सोमबार साँझ महर्जनको घरमा भोज थियो । नेपाल भारोत्तोलन संघका अध्यक्ष राम श्रेष्ठ (बोस) पनि पुगेका थिए । भोजमा सञ्जुले पनि सक्रियताका साथ खानेकुरा बाँडिरहेको र सबैसँग हासीखुसी व्यवहार गरिरहेको आफूले पाएको अध्यक्ष श्रेष्ठले अनलाइनखबरलाई बताए ।

‘म राति नौ बजेमात्र त्यहाँबाट निस्किएको हुँ । त्यसबीचमा मैले सञ्जुको बोली, व्यवहार र अनुहारमा तनावको कुनै संकेत पाएको थिइनँ । एकैपल्ट बिहानै सञ्जय गुरुले फोन गरेर यस्तो खबर सुनाउनुभयो,’ श्रेष्ठले भने, ‘मैले कुनै त्यस्तो संकेत पाएको भए सञ्जुको यो अवस्था आउन दिँदैनथ्यौं ।’

ललितपुरको महालक्ष्मी नगरपालिकामा पर्ने लुभुुमा प्रशिक्षक महर्जनको घरको भुइँतल्लाको कोठामा सञ्जु झुण्डिएको अवस्थामा मृत भेटिएकी हुन् । बिहान चाँडै उठेर प्रशिक्षणमा जाने सञ्जु अबेरसम्म नउठेपछि थोरै पर्दा खुलेको झ्यालबाट हेर्दा महर्जनले झुण्डिरहेको देखेका थिए । त्यसपछि उनले भारोत्तोलन संघका अध्यक्ष र प्रहरीलाई खबर गरेका हुन् ।

आत्महत्याअघि फेसबुकमा किन शेयर गरिन् त्यो भिडियो ?

सोमबार राति १० बजेर ३ मिनेटमा सञ्जुले आफ्नो फेसबुक एकाउन्टमा एउटा भिडियो सेयर गरेर क्याप्सनमा लेखेकी छन्, ‘मिसिङ यू लभ’ त्यसमा लभ इमोजी पनि राखिएको छ ।

यो भिडियो पाकिस्तानी वेव सिरिज ‘मेरे हमसफर’को हो । यहाँ सिरिजको दुई प्रमुख पात्रबीचको कुराकानीको क्रममा नायिकाले नायकसँग सोध्छिन्– ‘परिवारको दबावमा आएर तिमीले मलाई छोड्न त छोड्दैनौ नि ?’ त्यसपछि भिडियो निरन्तर भए पनि हिन्दी गीतको म्युजिक सुरु हुन्छ ।

यो सिरिजमा नायिकालाई उनको परिवारले मानसिक र शारीरिक तनाव दिएको हुन्छ । उनलाई साथ दिने एकमात्र व्यक्ति उनका श्रीमान हुन्छन् । यसै कथाको वरिपरि त्यो सिरिजको कथा घुमेको छ ।

२२ वर्षीया सञ्जुले ‘मिसिङ यू लभ’ भनेर यो सिरिजको क्लिप फेसबुकमा शेयर गर्नुलाई प्रेम र पारिवारिक तनावका बीच सञ्जुले मृत्युको बाटो रोजेको हो कि भन्ने प्रहरीको आशंका छ । अनलाईन खबर बाट 

सम्बन्धित वर्गका समाचारहरू

सुदूरपश्चिमका मन्त्री बोहराविरुद्ध उजुरी
धनगढी, १९ वैशाख / आचारसंहिताको उल्लंघन गरेको भन्दै सुदूरपश्चिम प्रदेशका सामाजिक विकास मन्त्री… विस्तृतमा
श्रमिकका हक संविधानमा लेखिए, व्यवहारमा आएन
धनगढी, १८ वैशाख /  ‘आठ घण्टा काम, आठ घण्टा आराम र आठ घण्टा मनोरञ्जन’को माग राख्दै अमेरिकाको सिकागो… विस्तृतमा
विश्वराज पोखरेललाई आईजीपी बनाउन गृहको प्रस्ताव
काठमाडौं, १८ वैशाख / गृह मन्त्रालयले प्रहरी अतिरिक्त महानिरीक्षक (एआईजी) विश्वराज पोखरेललाई प्रहरी… विस्तृतमा
जेठ १ गते देखि साताको २ दिन सार्वजनिक बिदा दिने…
सरकारले हप्तामा दुई दिन सार्वजनिक बिदा दिने निर्णय गरेको छ।  मंगलबार बसेको मन्त्रिपरिषद बैठकले जेठ… विस्तृतमा