धनगढीको बेलामा गौरा खेल (फोटो फिचर ) 

धनगढी, ९ भदौ । सुदूरपश्चिम  प्रदेशको प्रसिद्ध गौरा पर्व धुमधामले मनाईएको छ ।   धनगढी उपमहानगरपालिका वडा नम्बर ६ बेलादेवीधाममा पुरुषको खेल एउटा  र महिलाको दुईवटा खेल गरि  देउडा खेल चलिरहेको छ ।  देउडा खेल्ने र हेर्न दर्शकको भिड लागेको थियो । 

पुरुषहरूले जनै धारण गरेजस्तै पश्चिम नेपालमा महिलाहरूले दुबोधागो धारण गर्ने गर्दछन्।  गौराघरबाट गौरालाई सिङारेर गौराखलामा लग्ने गरिन्छ। सोही अवसरमा महिलाहरूले सामूहिक अठ्यावाली गाउँदै पूजा गर्ने चलन रही आएको छ। 

सुदूरपश्चिम क्षेत्रमा गौराको उत्पत्ति, महेश्वरसँगको विवाह लगायतका प्रसङ्ग व्रतालु महिलाले फागमार्फत नै भन्ने गरेका छन्। व्रतालु महिलाहरूले गौराको पूजा गरिसकेपछि मुख्य प्रसादको रूपमा रहेको बिरुँडाले आफ्ना श्रीमान्, छोराछोरी र आफन्तजनको चिरायु दीर्घायुको कामना गर्दै टाउको पुज्ने चलन छ।

पुरुषहरूले ठाँडोखेल, ढिस्को धमारी लगायतका ऐतिहासिक संस्कृतिमा आधारित खेलहरू खेल्ने गर्दछन्। महिलाले आफ्नो अटल सौभाग्य समृद्धि सन्तान र परिवारमा सुख शान्तिका लागि व्रत बसी पूजाआजा गर्ने गर्छन्। 

सुदूरपश्चिमका अधिकांश क्षेत्रमा  भदौ ४ गते देखि गौरा सुरु भइसकेको छ भने केही स्थानमा भदौ १८ गतेदेखि गौरा मनाउने तयारी भइरहेको छ। नेपाल सरकारको संस्कृति, पर्यटन तथा नागरिक उड्डयन मन्त्रालयले भने गत पुस २५ गते नै भदौ ७ गते गौरा पर्व मनाउने गरेर स्वीकृति दिएको थियो।