भारतले मिचेको भूमि दार्चुलाको छाङ्गरू पुगे प्रधानसेनापति र सशस्त्रका महानिरीक्षक

दार्चुला, असार ३ – नेपाली सेनाका प्रधानसेनापति पूर्णचन्द्र थापा र सशस्त्र प्रहरी बलका महानिरीक्षक शैलेन्द्र खनाल दार्चुलाको छाङ्गरू पुगेका छन्। बुधबार बिहान १० बजे दुबै सुरक्षाका प्रमुख दार्चुला ब्यास नगरपालिका वडा नम्बर १ मा पुगेको सशस्त्र प्रहरी बलका प्रवक्ता डिआइजी प्रविण कुमार श्रेष्ठले जानकारी दिए।
उनका अनुसार सशस्त्र प्रहरीले बनाएको बोर्डर आउट पोष्ट (बिओपी) र सेनाको अस्थायी बेस निरीक्षण गर्न पुगेका हुन्। 
दार्चुलाको छाङ्गरूमा गत वैशाख ३१ गते सशस्त्रको बिओपी र जेठ ७ गते घाँटीबगरमा सेनाको अस्थायी बेस क्याम्प स्थापना गरेको थियो।
साथै, दुबै प्रमुखले सेनाले बनाउँदै गरेको दार्चुलादेखि तिंकरको बाटोको निरीक्षण समेत गरेको दार्चुलाका सहायक सिडिओ टेकसिंह कुँवर जानकारी दिए।

‘तिंकरमा बनाउने भनेको बाटो निरीक्षण गर्न सेनाका प्रमुख आउनुभएको छ ।’ उनले भने, ‘निरीक्षण गरिसक्नु भयो। अब प्रमुख जिल्ला अधिकारीसँग बसेर छलफल हुनेछ।’
उनका अनुसार छलफल सकिएलगत्तै उनीहरू त्यहाँबाट फर्किने छन्।