६ महिने कटाई सिलाई तालिम सम्पन्न

धनगढी, असार ३०  – धनगढी उप–महानगरपालिकाको महिला तथा बालबालिका शाखाले अपाङ्गता भएका र विपन्न महिलाका लागि सञ्चालन गरेको ६ महिने कटाई सिलाई तालिम मङ्गलवार सम्पन्न भएको छ । अपाङ्गता भएका र विपन्न महिलाहरूको मागका आधारमा गत फागुन १ गते देखि धनगढीमा एडभान्स तहको कटाई सिलाई तालिम सञ्चालन गरेको उप–महानगरपालिकाका उप–प्रमुख सुशीला मिश्र भट्टले बताइन । तालिममा सहभागीहरूलाई प्रमाणपत्र हस्तान्तरण गर्दै उप–प्रमुख भट्टले यो तालिम अपाङ्गता भएका र विपन्नहरूको जीवनस्तर माथि उठाउनका लागि सञ्चालन गरिएको बताइन । 

‘तपाईँहरूले यो तालिमबाट धेरै कुरा सिक्नु भएको छ ।’ उप–प्रमुख भट्टले भनिन्, ‘सिकेको कुरालाई ब्यावहारमा उतार्नु होला । सिकाई निरन्तर भइरहने प्रक्रिया हो त्यसैले सिक्ने कुरा कहिल्यै पूर्ण हुँदैन ।’
तालिममा ३५ जनाको सहभागिता रहेको थियो ।