अब डोटीबाट धनगढी १८ मिनेटमै, शुक्रवारबाट सुरु भयो धनगढी– दिपायल हवाई सेवा 

धनगढी – लामो समयदेखि बन्द रहेको डोटीको दिपायल विमानस्थलबाट शुक्रवारबाट नियमित उडान सुरु भएको छ। धनगढीलाई मुख्य प्वाइन्ट बनाई समिट एयरलाइन्सले आजदेखि नियमित उडान सुरु गरेको हो । धनगढीबाट एडीभि ट्राभलको सहजीकरणमा उक्त सेवा आजबाट सुचारु भएको हो । 
अबदेखि धनगढीबाट बिहान १०ः३० बजे उडान भर्ने समिट एयरले र डोटीबाट ११ः३० मा उडान भर्ने छ। नियमित हवाई उडान हुने सुरु भएपछि डोटेलीहरूले खुसी व्यक्त गरेका छन्। शुक्रबार धनगढीदेखि १६ जना यात्रु लिएर आएको उक्त विमानले डोटीबाट १३ जना यात्रु लिएर गएको छ। 
हाललाई उक्त एयरलाइन्सले धनगढी–डोटी यात्राका लागि ३२ सय रुपैयाँ भाडा दर तोकेको छ। विमान मार्फत डोटीदेखि धनगढी जान चाहने व्यक्तिहरूले दिपायलमा रहेको होटेल रिभर साइडमा टिकटका लागि सम्पर्क गर्न सकिने उक्त एयरलाइन्सले जनाएको छ।