१९ महिनादेखि रोकिएको नेपाल–भारत मैत्री बस संचालनमा

महेन्द्रनगर १२ कार्तिक/१९ महिना अघिदेखि रोकिएको महेन्द्रनगर–दिल्ली सिधा बस सेवा शुक्रवारबाट पुनः सञ्चालनमा आएको छ । उत्तरप्रदेश परिवहनको बस बिहान पश्चिमी नाका गड्डाचौकी पुग्यो । महाकाली यातायात प्रालिका अध्यक्ष डम्बरराज पन्तसहितको व्यवसायी टोलीले यात्रुसहितको बसलाई महेन्द्रनगर बसपार्क भित्र्याए ।

कोरोनाको पहिलो लहर सुरु भएपछि महेन्द्रनगरबाट दिल्ली र देहरादूनका लागि छुटने बस सेवा बन्द भएको थियो । त्यसयता व्यवसायी मात्र होइनन्, यात्रु पनि निकै मर्कामा पर्दै आएका छन् । अध्यक्ष पन्तका अनु्सार नेपालबाट भारत जाँदा खासै झन्झट छैन । त्यता जान पीसीआर रिर्पोट पनि आवश्यक पर्दैन । तर, नेपाल भित्रिदा पीसीआर रिर्पोटलगायत तोकिएका स्वास्थ्यका सबै मापदण्ड फ्लो गर्नुपर्छ ।

‘त्यसको सहजिकरणका लागि गृह र स्वास्थ्य मन्त्रालयमा अनुरोध गरेका छौं,’ उनले भने, ‘कतिन्जेल बन्द गर्नु । सिधा बस सेवा सुरु भएमा नेपाली यात्रुलाई नै बढी फाइदा पुग्छ । नेपाल भित्रिने पर्यटकलाई पनि झन्झट हुदैन ।’ महाकाली यातायात प्रालिले भारत उत्तर प्रदेशको परिवहन निगमसँगको सहकार्यमा नेपाल–भारत मैत्रि बस सेवा सुरु गरेको थियो । कोरोना सुरु हुनुभन्दा पहिले दैनिक नेपाल र भारतका ९ वटा गाडी सञ्चालनमा थिए ।