भारतबाट चोरेर ल्याएको गहना र नगदसहित दुईजना पक्राउ

कञ्चनपुर — भारतबाट चोरेर ल्याएको लाखौंका गहना तथा नगदसहित दुई जनालाई प्रहरीले पक्राउ गरेको छ । कञ्चनपुरको दक्षिणी क्षेत्र बेलौरी नगरपालिका ८ पटैयाका ३८ वर्षीय लालबहादुर शाही र कैलालीको लम्की चुहा नगरपालिका ४ की ३८ वर्षीया विष्णुमाया शाही पक्राउ परेका हुन् ।

बेङलोरको एक घरमा काम गर्ने उनीहरूले सुन, चाँदी र हिराका गहनासंगै नगदसमेत चोरेर ल्याएको भारतीय प्रहरीको सूचनाको आधारमा इलाका प्रहरी कार्यालय त्रिभुवन बस्ती र सशस्त्र प्रहरीको बिओपीको टोलीले उनीहरूलाई सोमबार राति २ बजे पक्राउ गरेको हो ।

इलाका प्रहरी कार्यालय त्रिभुवन बस्तीका प्रहरी निरीक्षक कैलाशसिंह विष्टका अनुसार गहना र नगद कति छ भन्नेबारे प्राविधिक बेलाएर छानबिन भइरहेको छ । साथै सुनका तिलहरी, सिक्री, औंठी लगायत थुप्रै गहनाहरू रहेको बताइएको छ ।

यस्तै उनीहरूको साथमा भारतीय रुपैयाँसहित अमेरिकन डलर, मलेसियन रिंगेट पनि भेटिएको प्रहरीले बताएको छ । ७ किलोग्रामभन्दा बढी गहना र ४ लाखभन्दा बढी नगद हुन्सक्ने प्रहरीको प्रारम्भिक अनुसन्धानबाट खुलेको छ ।