धनगढीमा साझा उम्मेदवारलाई जिताउन संयुक्त गठबन्धनको अपिल

धनगढी,२३ वैशाख /  धनगढी उपमहानगरपालिकामा पाँच दलीय गठबन्धनका साझा उम्मेदवारलाई जिताउन अपिल गरिएको छ ।

बिहीबार संयुक्त प्रेस विज्ञप्ति जारी गर्दै नेपाली कांग्रेस, माओवादी केन्द्र, नेकपा एकीकृत समाजवादी र राष्ट्रिय जनमोर्चाले गठबन्धनका साझा उम्मेदवारलाई जिताउन अपिल गरेका हुन्।

यही वैशाख ३० गते हुने स्थानीय तहको निर्वाचनका लागि धनगढीमा पनि पाँच दलीय गठबन्धन गरिएको छ । प्रमुखमा नेपाली काँग्रेसका नृपबहादुर वड र उपप्रमुखमा नेकपा माओवादी केन्द्रका शन्ति अधिकारीलाई गठबन्धनको साझा उम्मेदवारका रुपमा अघि सारिएको छ । भने वडा स्तरमा गठबन्धनका घटक दलहरुबीच मित्रवत प्रतिस्पर्धा हुने भएको हो ।

संयुक्त जारी विज्ञप्तिमा भनिएको छ,'गठबन्धनमा आवद्ध सबै राजनीतिक दलका स्थानीय वडा तहको नेतृत्व, वडा अध्यक्ष तथा सदस्य पदका उम्मेदवारहरू वडा तहमा आआफ्नो दलका उम्मेदवारका पक्षमा मत माग्ने र गठबन्धनका साझा मेयर पदका उम्मेदवारको निर्वाचन चिन्ह रुखमा र उपप्रमुखका उम्मेदवारको निर्वाचन चिन्ह गोलाकारभित्र हँसिया हतौडामा मतदान गर्ने वातावरण सुनिश्चित गर्न अनुरोध गर्दछौँ ।'