यस्तो छ आज दिनभरको मौसम पूर्वानुमान, सुदूरपश्चिममा भारी वर्षा

धनगढी, २५ असार – देशभर मनसुनी वायुको सामान्य प्रभाव कायम रहेकोले शनिवार बिहानबाटै देशका विभिन्न स्थानमा वर्षा भइरहेको छ । गण्डकी प्रदेश, लुम्बिनी प्रदेश र सुदूरपश्चिम प्रदेशमा सामान्यता देखि पूर्ण बदली रही देशको बाँकी भू–भागमा आँशिकदेखि सामान्य बदली रहेको जल तथा मौसम विभागको मौसम पूर्वानुमान शाखाले जनाएको छ ।
‘गण्डकी प्रदेश, लुम्बिनी प्रदेश, कर्णाली प्रदेश र सूदुरपश्चिम प्रदेशका धेरै स्थानहरुमा मेघ गर्जन÷चट्याङ्ग सहित हल्कादेखि मध्यम वर्षा भइरहेको छ र एक–दुई स्थानमा भारी वर्षासमेत भइरहेको छ र बाँकी भू–भागका एक–दुई स्थानहरूमा हल्कादेखि मध्यम वर्षा भइरहेको छ,’ महाशाखाको मौसम बुलेटिनमा उल्लेख छ ।

शनिवार दिउँसो देशका पहाडी भू–भागमा सामान्यदेखि पूर्ण बदली रहनेछ र बाँकी भू–भागमा आंशिकदेखि सामान्य बदली रहनेछ। केही स्थानमा भारी वर्षाको पूर्वानुमान गरिएको छ।‘वाग्मती, गण्डकी, लुम्बिनी, कर्णाली र सुदूरपश्चिम प्रदेशका धेरै स्थानहरुमा र बाँकी प्रदेशका केही स्थानहरुमा मेघ गर्जन÷चट्याङ्गसहित हल्कादेखि मध्यम वर्षाको सम्भावना रहेको छ,’ महाशाखाको बुलेटिनमा भनिएको छ, ‘लुम्बिनी प्रदेश र सुदूरपश्चिम प्रदेशका थोरै स्थानहरुका साथै गण्डकी प्रदेश र कर्णाली प्रदेशका एक–दुई स्थानमा भारी वर्षाको सम्भावना रहेको छ।’
राती देशभर आंशिकदेखि सामान्य बदली रहनेछ । देशका केही स्थानहरुमा हल्कादेखि मध्यम वर्षाको सम्भावना रहेको महाशाखाले जनायो ।