दिल्लीमा रहेका बैतडीका एक युवामा कोरोना संक्रमण

धनगढी – भारतको दिल्लीमा रहेका बैतडीका एक युवामा कोरोना संक्रमण देखिएको छ । दिल्लीको आजादपुर मण्डीमा जेसीए ट्रेडर्स नामक फलफुल कम्पनीमा कार्यरत बैतडीको दोगडा केदार गाउँपालिका ९ चडेपानी (बगौरा) घर भएका २३ वर्षीय रमेश दत्त भट्टलाई कोरोना संक्रमण देखिएको हो ।

लकडाउनका बेला पनि काम गरीरहेका उनमा रुघाखोकी र श्वासप्रश्वासमा अप्ठेरो भएपछि चार दिनअघि उनको थ्रोट स्वाब संकलन गरिएको थियो ।

बिहीबार उनको थ्रोट स्वाबको नमूना पोजिटिभ आएको उनीसँगै दिल्लीमा रहेका दत्तराज भट्टले बताए । रमेशलाई बिहीबार राती नै दिल्लीको राम मनोहर लोहिया अस्पतालमा आइसोलेसन वार्डमा भर्ना गरिएको छ । उनको स्वास्थ्य अवस्था भने सामान्य रहेको छ ।